Fimm tonna tjakkur féll á fót starfsmanns álversins í Straumsvík

Það tók um hálftíma að losa byrði sem féll ofan á fót starfsmann álversins í Straumsvík en slysið átti sér stað laust eftir hádegi í dag. Það var fimm tonna tjakkur sem féll ofan á fótinn, en hann féll úr krana og á fót starfsmannsins.

Sjúkrabíll, lögregla og slökkvilið voru kölluð til og komu á vettvang um hálf tvö í dag en slökkviliðsmenn þurftu að notast við tækjabúnað sinn til þess að losa manninn. Það er ljóst er að starfsmaðurinn er verulega slasaður á fæti. Ekki er hægt að fullyrða á þessu stigi hversu alvarlegir áverkarnir eru en líðan starfsmannsins mun hafa verið góð eftir atvikum.

„Í janúar náðum við sex árum án svokallaðra fjarveruslysa," útskýrir Ólafur Teitur Guðnason, spurður hversu langur tími er síðan alvarlegt slys átti sér stað í álverinu í Straumsvík. Hann útskýrir að eitt ár er um milljón vinnustundir og því náði fyrirtækið sex milljónum vinnustunda án slyss.

„Það var síðan í febrúar sem starfsmaður var á stórri vinnuvél og bakkaði á. Hann hlaut heilahristing við áreksturinn," segir Ólafur og því hafa tvö slys orðið eftir áramót sem myndu flokkast undir fjarveruslys.