38 milljarða tap vegna vaxtadómsins

Landsbankinn hefur gjaldfært 38 milljarða króna vegna taps af gengistryggðum útlánum í kjölfar dóms Hæstaréttar í febrúar síðastliðnum. Hagnaður bankans nam samt sem áður tæpum sautján milljörðum á síðasta ári.

Þetta kemur fram í ársreikningi Landsbankans sem birtur var í gær. Arðsemi eigin fjár var 8,8 prósent og er eigið fé bankans nú rúmir 200 milljarðar króna. Virðisrýrnun útlánasafns er 23,6 milljarðar en þá er búið að gera ráð fyrir virðisaukningu á árinu að frádregni 38 milljarða niðurfærslu vegna dóms Hæstaréttar í febrúar síðastliðnum um réttmæti þess að nota viðmiðunarvexti Seðlabankans aftur í tímann, þegar lánveitandi hafði gefið út fullnaðarkvittanir fyrir greiðslum afborgana.

Þessi fjárhæð er í samræmi við sviðsmynd sem Fjármálaeftirlitið óskaði eftir að fjármálafyrritæki notuðu sem viðmið við útreikning á áhrifum dómsins. Bankinn segir þetta þó ekki breyta því að fleiri dóma sé þörf til að skýra stöðu annarra lána en fjallað er um í þessu tiltekna dómsmáli. Ástæða fyrir því að áhrif dómsins eru gjaldfærð árið 2011 er að ársreikningur skal á hverjum tíma endurspegla eignasafnið eins og það er í raun og veru. Það kann því að vera að niðurstaðan breytist og mun munurinn þá verða tekjufærður í næsta ársreikningi.

Landsbankinn er annar bankinn sem gefur út áhrif gengislánadómsins á efnahagsreikning sinn, fyrr í vikunni gaf Arion Banki út sinn ársreikning og kom þar fram að áhrif dómsins væru metin á 13,8 milljarða króna fyrir skatt. Íslandsbanki hefur ekki gefið út sinn ársreikning en ljóst er að áhrif gengislánadómsins hlaupa á tugum milljarða króna.