Borgarverðir aðstoði útigangsfólk

Borgarverðir eru færanlegt vettvangsteymi sérfræðinga sem mun þjónusta utangarðsfólk í Reykjavík. Í frétt á vef Reykjavíkurborgar segir að þeim sé ætlað að aðstoða fólk sem á í erfiðleikum vegna vímuefnafíknar og/eða geðsjúkdóma og sem stöðu sinnar vegna lendir í aðstæðum á almannafæri sem það ræður ekki við eða veldur öðrum ónæði.

Þá segir að borgarverðirnir muni aðstoða viðkomandi við að komast viðeigandi skjól eða kalla eftir annarri aðstoð eftir þörfum. „Markmiðið er að aðstoða viðkomandi við að komast í úrræði við hæfi. Jafnframt munu Borgarverðir sinna forvarnar- og leitarstarfi sem er til þess fallið að koma í veg að þessir einstaklingar lendi í erfiðleikum með sjálfa sig eða aðra eða lendi þeim aðstæðum að valda ónæði á almannafæri í Reykjavík. Öll aðstoð skal byggjast á grundvelli mannréttinda og skal mannréttindastefna Reykjavíkurborgar höfð að leiðarljósi."

Velferðarsvið borgarinnar leggur til tvö stöðugildi fagaðila í verkefnið og Lögreglustjórinn á höfðuborgarsvæðinu leggur til eitt stöðugildi lögreglumanns. „Saman mynda þessir aðilar Borgarverði. Miðað skal við að þjónustutími Borgarvarða er virka daga frá 11-19 en þjónustutíminn skal vera sveigjanlegur eftir því sem þörf er á. Borgarverðir munu starfa frá Þjónustumiðstöð Miðborgar og Hlíða. Auk þess leggur Velferðarsvið til bifreið og aðstöðu fyrir starfsmenn verkefnisins."

„Velferðarsvið tryggja samstarf við Hjálpræðisherinn á Íslandi sem nú þegar rekur dagsetur fyrir utangarðsfólk, Rauða kross Íslands vegna heilsubílsins, Frú Ragnheiðar, Gistiskýlið í Reykjavík, næturathvarf fyrir heimilislausa karla, Konukot, athvarf fyrir heimilislausar konur og önnur úrræði sem sérstaklega eru ætluð utangarðsfólki," segir ennfremur.

Þá kemur fram að þau erindi sem berist til borgarvarða verði skráð og ástæður útkalla kortlagðar og hvernig brugðist er við hverju sinni. „Með því er hægt að sjá betur hvar skóinn kreppir í þjónustu við utangarðsfólk. Starfsmenn eru bundnir þagnarskyldu um hvað eina sem snýr að notendum þjónustunnar og meðferð persónuupplýsinga í samræmi við lög og reglur þar að lútandi."

Stöður Borgarvarða munu brátt taka til starfa en stöður þeirra voru auglýstar í blöðum um helgina, segir að lokum.