Krefst svara vegna uppsagnar Gunnars

Birkir Jón Jónsson, fulltrúi Framsóknarflokksins í efnahags- og viðskiptanefnd, hefur óskað eftir fundi í nefndinni til að fara yfir stöðu Fjármálaeftirlitsins.

Eins og kunnugt er var Gunnar Andersen rekinn úr starfi forstjóra stofnunarinnar í dag. Þá hefur stjórn FME kært hann til lögreglunnar fyrir að hafa nálgast trúnaðargögn um Guðlaug Þ. Þórðarson þingmann á ólöglegan hátt.

Birkir Jón vill að stjórn Fjármálaeftirlitsins mæti á fund efnahags- og viðskiptanefndar og geri grein fyrir stöðu mála í kjölfar uppsagnar forstjóra stofnunarinnar. Segir hann brýnt að þessi fundur fari fram hið fyrsta.