Ekki forsendur til að greiða Róberti árangursþóknun

Tvö dótturfélög Novators telja að ekki séu forsendur til að efna fjárfestingarsamning við Róbert Wessman, fyrrverandi forstjóra Actavis, þar sem áætlanir um rekstur Actavis hafi ekki staðist. Ekki er byggt á umboðsleysi Björgólfs Thors Björgólfssonar til að skuldbinda félögin, eins og áður hefur komið fram.

Síðari hluta aðalmeðferðar í máli Róberts gegn félögunum Novator Pharma Holding og Novator Pharma S.a.r.l lauk í Héraðsdómi Reykjavíkur í morgun, en Róbert höfðaði mál gegn félögunum tveimur og krafðist 30 milljóna evra, jafnvirði 4,8 milljarða króna, vegna ógreiddrar árangurstengdrar þóknunar (e. success fee) sem hann taldi sig eiga inni hjá félögunum.

Málið snýst um fjárfestingarsamning sem Róbert gerði við fyrirtækin tvö árið 2007 meðan hann var enn forstjóri Actavis, en hann lét af starfi forstjóra fyrirtækisins hinn 4. ágúst 2008. Ákvæði í fjárfestingarsamningi um áðurnefnda árangursþóknun var byggt á tvenns konar skilyrðum, annars vegar ef Actavis yrði selt og hins vegar ef ekki tækist að ljúka sölu á fyrirtækinu fyrir lok árs 2009.

Fram kom í fréttum okkar í gær að lögmaður félaganna tveggja, Novator Pharma Holdings og Novator Pharma S.a.r.l, hafi haldið því fram að félögin tvö væru ekki skuldbundin til að efna samkomulag við Róbert þar sem eigandi félaganna, Björgólfur Thor Björgólfsson, hafi ekki haft umboð til að gera samninga í þeirra nafni þar sem hann hafi skort umboð. Var þetta byggt á upplýsingum sem komu fram við aðalmeðferð málsins, en á rætur að rekja til misskilnings. Hið rétta er að aðallega er byggt á því að forsendur fyrir árangurstengdu greiðslunni til Róberts Wessman séu brostnar og því sé ekki hægt að efna ákvæði fjárfestingarsamningsins frá 2007. Björgólfur Thor hefur aldrei haldið því fram að hann hafi ekki haft umboð til að gera samninga í nafni dótturfélaga Novators og það leiðréttist því hér með.

Væntingar um rekstur Actavis stóðust ekki

Í starfslokasamningi Róberts og Actavis frá 2008 var sérstaklega vísað til fjárfestingarsamnings milli Róberts og Novator Pharma Holdings og Novator Pharma S.a.r.l, en þegar samningur um starfslok var gerður var Björgólfur Thor stjórnarformaður Actavis.

Jan Rottiers, lögfræðingur hjá Novator sem situr í stjórn Novator Pharma Holdings og Novator Pharma S.a.r.l, gaf skýrslu fyrir dómi í gær. Fram kom í máli hans að Björgólfur Thor hafi ekki haft umboð til að skuldbinda félögin tvö þegar vísað var í fjárfestingarsamninginn í starfslokasamningi sem gerður var við Róbert Wessman þegar hann hætti sem forstjóri Actavis. Þ.e að Björgólfur Thor hafi í raun ekki haft heimild til að setja sérstakt ákvæði í samning sem gerður var milli Actavis og Róberts sem skuldbatt Novator Pharma S.a.r.l og Novator Pharma Holdings.

Hins vegar er litið svo á að samningur Róberts og Novator-félaganna tveggja frá 2007 hafi verið fullgildur þegar hann var gerður, en deilt er nú um hvort hann standi enn. Reimar Pétursson, hrl. sem er lögmaður Novator-félaganna tveggja, hélt því fram fyrir dómi að forsendur fyrir samningnum væru brostnar og því væri félögunum ekki skylt að efna ákvæði hans.

Við aðalmeðferð málsins kom fram að Novator hefði tekið Actavis yfir árið 2007 með 5,3 milljarða evra yfirtöku sem að langstærstu leyti var fjármögnuð af Deutsche Bank.

Actavis braut lánasamning við Deutsche Bank

Við aðalmeðerð málsins í gær kom m.a fram að ljóst hafi verið í upphafi árs 2008 að væntingar um rekstur Actavis stæðust ekki, en Sigurður Óli Ólafsson, fyrrverandi forstjóri Actavis, gaf skýrslu símleiðis og sagði að Actavis hefði verið nálægt því að brjóta ákvæði í lánasamningum við Deutsche Bank alla ársfjórðunga ársins 2008. „Áætlanir höfðu töluvert lækkað og Deutsche Bank hafði byrjað að skipta sér mun meira af rekstrinum," sagði Sigurður Óli. Síðar kom fram að í október 2008 hafi ákvæði í lánasamningi (e. covenant) við Deutsche Bank verið brotið með þeim hætti að leggja þurfti félaginu til 150 milljónir evra.

Málið var dómtekið að lokinni aðalmeðferð í morgun og ætti niðurstaða að liggja fyrir innan fjögurra vikna.

Óvíst er hvort nokkrir fjármunir eru inni í Novator Pharma S.a.r.l og Novator Pharma Holdings til að efna kröfu Róberts á hendur félaginu fari svo að félögin verði dæmd til að greiða hana. Novator-félögin tvö eru ekki lengur skráð yfir þeim eignarhaldsfélögum sem eiga Actavis í dag, en fyrirtækið fór í gegnum fjárhagslega endurskipulagningu áður en það fór undir óbein yfirráð Deutsche Bank á árinu 2010. Haustið 2010 var í raun tilkynnt um óbeina yfirtöku Deutsche Bank á Actavis með tilkynningu um samruna til framkvæmdastjórnar Evrópusambandsins.