Fáheyrður atburður í Hæstarétti

Það er afar sjaldgæft að dómar sem komnir séu á dagskrá séu ekki kveðnir upp í tæka tíð í Hæstarétti. Þetta segir skrifstofustjóri réttarins, en hann rekur ekki minni til að þetta hafi gerst áður.

Birta átti dóm í dag í máli Baldurs Guðlaugssonar, fyrrverandi ráðuneytisstjóra, en ekki tókst að klára dómsorðið í tæka tíð og því var dómurinn ekki birtur. Hinn 7. apríl í fyrra var Baldur dæmdur í tveggja ára fangelsi fyrir innherjasvik og brot í opinberu starfi í Héraðsdómi Reykjavíkur. Dómnum var árýjað til Hæstaréttar og átti að kveða upp dóm réttarins í málinu í dag og var dómsuppkvaðningin þegar komin á dagskrá réttarins kl. 16. Þá var á forsíðu vefjar Hæstaréttar tilkynning um að dómurinn yrði birtur í dag.

Dómarar í kapphlaupi við tímann

„Þegar á reyndi reyndist atkvæðið (dómurinn í heild innsk.blm) ekki tilbúið. Menn voru í kapphlaupi við tímann og sprungu á limminu," segir Þorsteinn A. Jónsson, lögfræðingur og skrifstofustjóri Hæstaréttar.

Hefur þetta gerst áður? „Ég þori ekki að fullyrða um það, en þetta er allavega mjög sjaldgæft," segir Þorsteinn. Hann segir að dómurinn verði kveðinn upp á morgun kl. 13:30.