Sérstakur saksóknari: Höfum tvö ár til stefnu

Ólafur Þór Hauksson, sérstakur saksóknari, segir að þunginn í rannsóknum á stórum málum hafi verið á árinu 2010 og 2011. Embættið hafi enn tvö ár til stefnu til að ná markmiðum sínum. Þá hafi tafir á afhendingu gagna frá útlöndum seinkað rannsóknum embættisins.

„Þetta hefur gengið hægar og það eru nokkrar ástæður fyrir því. Fjölgun starfsmanna gekk hægar en ráð var fyrir gert. Auk þess sem rannsóknir reyndust umfangsmeiri. Þá er erlendi leggurinn að tefja okkar, þ.e.as framkvæmd réttarbeiðna í þeim málum sem að teyga sig út fyrir landsteinana," segir Ólafur Þór, en þar er hann að vísa til beiðna um gagnkvæma réttaraðstoð í sakamálum. Eins og um skýrslutökur og afhendingu gagna.

Háðir gögnum frá útlöndum

Embætti sérstaks saksóknara er háð gögnum frá útlöndum en sú skylda hvílir á rannsakendum að rannsaka mál til hlítar áður en ákvörðun er tekin um lúkningu þeirra.

Hvers vegna hefur ekki verið gefin út nein ákæra í stóru málunum? „Það lá alveg fyrir að mesta þyngdin í rannsóknunum yrði á þessum árum, 2010 og 2011 og inn á árið 2012, en á árinu 2012 myndum við fara að sjá framan í þessi stærri mál sem að við eigum alveg von á að gangi eftir."

Embættið á að starfa út árið 2013. Hvað gerist ef ykkur tekst ekki að klára þessi mál sem þið höfðuð sett ykkur að klára. Verður þá sá tími framlengdur? „Það er óvíst enn sem komið er. Það er nýlega búið að skipa nefnd sem á að ákveða hver verður framtíð rannsókna efnahagsbrota þegar að þunginn í bankarannsóknum er frá og það er ráð fyrir því gert að tillögur um það liggi fyrir ekki seinna en á árinu 2013," segir Ólafur Þór Hauksson, sérstakur saksóknari. thorbjorn@stod2.is