Opinberir stjórnendur geta ekki krafist sömu launa og í einkageiranum

„Menn geta ekki gert ráð fyrir því, ef þeir ráða sig í stjórnunarstöðu hjá íslenska ríkinu, að hafa laun sem eru sambærileg við laun í einkageiranum og í útlöndum," segir Mörður Árnason, þingmaður Samfylkingarinnar. Már Guðmundsson seðlabankastjóri hefur stefnt Seðlabanka Íslands vegna launamála. Hann telur að launin sem kjararáð hafi ákvarðað honum séu lægri en launin sem honum var heitið þegar gengið var frá skipun hans í starfið. Þá hefur Steinþór Pálsson, bankastjóri Landsbankans, og bankaráð bankans sagt að bankaráð en ekki kjararáð eigi að ákveða laun bankastjóra Landsbankans.

Mörður segir að sjónarmið sín varðandi launakjör opinberra starfsmanna eigi við um þá báða, en hann vill ekki tjá sig um málshöfðun Más gegn Seðlabankanum. „Það verður að hafa samhengi í samfélaginu og það samhengi verður líka að ná til launamála," segir Már. Aðspurður um hvað sé þá eftirsóknarvert við að vinna í stjórnunarstöðu hjá hinum opinbera segist Mörður ekki geta sagt til um það. „Af hverju sækja svona margir um stjórnunarstöður hjá hinu opinbera? Það er ekkert lát á því," segir Mörður á móti.

Mörður tekur skýrt fram að hann sjái vel að í þessari umræðu sé ákveðinn vandi á ferð og sá vandi verði alltaf fyrir hendi. „En það geta verið ákveðnir kostir vð að vinna hjá opinberum fyrirtækjum. Án þess að tala um Steinþór og Má, þá kemur það fram í lífeyrismálum og oft er atvinnuöryggið meira en í einkageiranum," segir Mörður. Hann ítrekar þó að þessi umræða sé hvorki einföld né auðleysanleg.

Fréttastofa Stöðvar 2 og Vísis hefur reynt að ná tali af Steingrími J. Sigfússyni, efnahags- og viðskiptaráðherra, vegna málsins og Helga Hjörvar, formann efnahags- og viðskiptanefndar Alþingis, en ekki haft erindi sem erfiði. Aðstoðamaður Jóhönnu Sigurðardóttur forsætisráðherra vísaði á efnahags- og viðskiptaráðuneytið þegar hún var innt eftir viðbrögðum við fréttum af málshöfun Más.