Veltan í fasteignaviðskiptum jókst um 45% í fyrra

Heildarvelta fasteignaviðskipta á landinu í fyrra jókst um tæplega 45% frá árinu 2010 og kaupsamningum fjölgað um rúmlega 40%. Velta 2011 er á landsvísu svipuð og árið 2008.

Þetta kemur fram á vefsíðu Þjóðskrár Íslands. Þar segir að um 6.600 kaupsamningum var þinglýst í fyrra á landinu öllu og námu heildarviðskipti með fasteignir rúmlega 170 milljörðum króna. Meðalupphæð á hvern samning var um 26 milljónir króna. Til samanburðar var veltan tæplega 119 milljarðar árið 2010, kaupsamningar rúmlega 4.700 og meðalupphæð hvers samnings um 25,2 milljónir króna.

Sé litið til höfuðborgarsvæðisins stefnir heildarupphæð þinglýstra kaupsamninga í um 136 milljarða króna, kaupsamningar verða um 4.600 og meðalupphæð kaupsamnings verður um 29,6 milljónir króna.

Heildarupphæð þinglýstra kaupsamninga á höfuðborgarsvæðinu á árinu 2010 var tæplega 86,7 milljarðar króna og fjöldi kaupsamninga var tæplega 3.000. Meðalupphæð samninga árið 2010 var um 29,1 milljón króna.

Heildarvelta á höfuðborgarsvæðinu hefur því aukist um tæplega 57 % og fjöldi kaupsamninga hefur aukist um rúmlega 54%