Erindi og ástæður nýrrar ríkisstjórnar

Ný ríkisstjórn Samfylkingar og Vinstri grænna hefur tekið til starfa. Samfylkingarfólk harmar brotthvarf Árna Páls Árnasonar úr ríkisstjórninni, það undirstrikar mikilvægi þess að flokkurinn eigi ötula talsmenn frjálslyndrar atvinnustefnu, lykilþráðar í stefnu flokksins. Árni Páll verður þar áfram. Báðir stjórnarflokkarnir gáfu eftir. Ég er þess fullviss að mikill meirihluti Samfylkingarfólks, ekki bara þeir, sem sátu flokksstjórnarfund sl. föstudag styður nýja ríkisstjórn.

Það er pólitísk staðreynd sem við verðum að horfast í augu við, að breytt ráðherraskipan var forsenda lausna í þremur lykilmálum ríkisstjórnarsáttmálans: Farsælli niðurstöðu í áratuga deilum um fiskveiðistjórnunarkerfið, niðurstöðu þar sem saman fara hagsmunir greinarinnar um arðsemi og hagkvæmni, réttlát hlutdeild þjóðarinnar í auðlindinni (auðlindarentunni) og skynsamlegir möguleikar á nýliðun smærri aðila.

Ráðherraskiptin eru líklega einnig forsenda þess að takist að ljúka með eðlilegum hætti samningum um aðild Íslands að ESB, sem hægt verði að bera undir þjóðina. Í þriðja lagi að koma í höfn áratuga baráttumáli vinstri manna um eitt atvinnuvegaráðuneyti, þar sem úreltri atvinnuvegaaðgreiningu og sérhagsmunagæslu verði aflétt.

Baráttumál sem hefur einmitt strandað á sérhagsmunagæslu. Þessi þrjú lykilverkefni voru vonlítil með óbreyttri ráðherraskipan. Önnur mikilvæg verkefni bíða ríkisstjórnarinnar s.s. rammaáætlun um auðlindanýtingu, tillögur um breytingar á stjórnarskrá og að halda áfram því stóra verkefni að auka enn frekar jöfnuð í íslensku samfélagi, eftir að ójöfnuður hafði hér stöðugt aukist frá árinu 1996, upphafi ríkisstjórnar Framsóknarflokks og Sjálfstæðisflokks. Fjármálaráðuneyti og velferðarráðuneyti gegna þar lykilhlutverki, auk þess sem ekki má vanmeta hlutverk fjármálaráðuneytis í mótun atvinnustefnu og umgjörðar atvinnulífs.

Við munum leggja erindi okkar og árangur fyrir íslensku þjóðina í kosningum vorið 2013. Við gerðum upp við hrunið, komum á efnahagslegum stöðugleika, náðum tökum á ríkisfjármálum, um leið og við stóðum vörð um þá sem minnst hafa og jukum jöfnuð.

Við afnámum pólitískar embættaveitingar, eitt ömurlegasta birtingarform spillingar á Íslandi. Við kvíðum ekki dómi íslensku þjóðarinnar ef stjórnarflokkarnir halda áfram á sömu braut.