Gjaldþrotum fjölgar um 63% milli ára

Fyrstu 11 mánuði ársins 2011 er fjöldi gjaldþrota 1.432 sem er um 63% aukning frá sama tímabili árið 2010 þegar 877 fyrirtæki voru tekin til gjaldþrotaskipta.

Þetta kemur fram á vefsíðu Hagstofunnar. Þar segir að í nóvember síðastliðnum voru 115 fyrirtæki tekin til gjaldþrotaskipta samanborið við 101 fyrirtæki í nóvember 2010. Eftir atvinnugreinum voru flest gjaldþrot í fjármála- og vátryggingastarfsemi.

Í nóvember voru skráð 166 ný einkahlutafélög (ehf) samanborið við 117 einkahlutafélög í nóvember 2010. Eftir atvinnugreinum voru flest einkahlutafélög skráð í heild- og smásöluverslun, viðgerðir á vélknúnum ökutækjum. Heildarfjöldi nýskráðra einkahlutafélaga er 1.568 fyrstu 11 mánuði ársins.