Landaður afli í Faxaflóahöfnum jókst um tæp 13% milli ára

Aukning á lönduðum afla hjá Faxaflóahöfnum milli áranna 2010 og 2011 nam um 16.800 tonnum eða um 12,8%. Aukningin var að mestu í Reykjavík en á Akranesi barst svipaður afli á land í fyrra og árið 2010. Heildaraflinn í fyrra nam 148.200 tonnum, að því er segir á heimasíðu hafnanna.

Botnfisksafli var nánast sá sami milli ára eða 80.800 tonn, en veruleg aukning var í uppsjávarfiski og þá einkum makríl. Í heild var landað 56.000 tonnum af uppsjávarfiski í fyrra á móti 31.200 tonnum árið 2010. Um 16.100 tonnum af makríl var landað í fyrra á móti 4.600 tonnum árið 2010.

Nokkur aukning var í lönduðum þorski, gullkarfa, djúpkarfa, en minnkun í grálúðu og úthafskarfa svo dæmi séu tekin. Ýsu og ufsa var landað í sambærilegu magni á milli ára.