Vafasamt að verðtrygging neytendalána standist lög

Tveir lögmenn sem unnu álitsgerð um hvort verðtrygging á Íslandi sé lögleg eða ekki telja verulegan vafa á því að það standist lög að selja almennum neytendum verðtryggð lán.

Álitsgerðin var unnin fyrir Verkalýðsfélag Akraness sem hyggst í kjölfarið leggja til að verðtrygging á neytendalánum verði afnumin á ársþingi ASÍ í október. „Verðtryggingin hefur leikið skuldsett heimili skelfilega á liðnum árum og áratugum," segir á síðu Verkalýðsfélagsins. Verkalýðsfélagið telur afar brýnt að látið verði reyna á það fyrir dómstólum hvort verðtrygging á neytendalánum standist lög eða ekki, enda þurfi að „berjast fyrir afnáminu með kjafti og klóm".

Það voru hæstaréttarlögmaðurinn Björn Þorri Viktorsson og héraðsdómslögmaðurinn Bragi Dór Hafþórsson sem unnu álitsgerðina, sem má nálgast á þessum hlekk.

Lögmennirnir telja að verðtryggð skuldabréf teljist vera svonefndir afleiðusamningar og séu því flóknir fjármálagerningar. „Þetta þýðir í raun að mati undirritaðra að fjármálafyrirtækjum hafi verið óheimilt að bjóða til sölu og selja almennum fjárfestum (neytendum) verðtryggða lánssamninga eða skuldabréf þar sem uppgjör lánsins var bundið vísitölu neysluverðs," segir í álitsgerðinni.

Einnig telja þeir að verðtrygging á neytendalánum sé mögulega andstæð Evrópulögum. Það gæti haft í för með sér stórkostlega skaðabótahættu fyrir íslenska ríkið að mati tvímenninganna.