Sigríður Ben: Jákvætt að fólk hafi val um lánamöguleika

Sigríður Benediktsdóttir, framkvæmdastjóri fjármálastöðugleika Seðlabankans, segir það jákvætt að lántakendur hafi valkost um hvernig íbúðalán það tekur sér. Hins vegar sé ljóst að greiðslubyrði af óverðtryggðum lánum verði hærri hér en í nágrannaríkjum. Ný skýrsla um fjármálastöðugleika var kynnt í morgun.

„Almennt teljum við að það sé gott að lántakendur hafi valkost um að fá sér breytileg vaxtalán eða fast vaxtalán eða hvað sem það er. Og verðlagning á þeim lánum sé þá eftir þeirri áhættu sem er í því," segir Sigríður í samtali við fréttastofu.

Í ritinu kemur fram að 86 prósent nýrra íbúðalána séu óverðtryggð lán, og því eru nær öll ný íbúðalán veitt af endurreistu bönkunum en ekki Íbúðalánasjóði.

„Á hinn bóginn vitum vð að greiðslubyrði af óverðtryggðum lánum með breytilegum vöxtum sveiflast meira. Þannig að ef þetta verður verulegur hluti lánasafns heimilanna þá höfum við ákveðnar áhygggjur af því að þetta geti haft áhrif á stöðugleika heimila þegar vextir hækka," segir Sigríður.

Hún segir að þau lönd þar sem óverðtryggiðr vextir séu boðnir og algengir á markaði, og Ísland hafi horft til við uppbyggingu síns kerfis, séu breytilegir vextir og verðbólga með allt öðrum hætti en hún hefur verið hér á landi undanfarin ár. „Þar af leiðandi eigum við eftir að sjá meiri hækkanir á vöxtum breytilegra vaxtalána en þessar þjóðir hafa séð, eins og Bretar og Danir," segir Sigríður.

Enn séu óverðtryggð lán þó það lítill hluti af lánum heimila að þetta sé ekki neitt til að hafa áhyggjur af enn sem komið er.

„En við göngum skrefinu lengra og ætlum að fylgjast með því hernig þetta er áhættumetið innan bankanna," segir Sigríður.