Krefjast þess að framkvæmdir hefjist nú þegar

Það stendur til að ganga í hvert hús í Fjarðabyggð í dag og næstu daga til þess að safna undirskriftum íbúa til að skora á Alþingi og ríkisstjórn Íslands um að framkvæmdir hefjist nú þegar við gerð Norðfjarðarganga. Páll Björgvin Guðmundsson, bæjarstjóri Fjarðabyggðar, segir i tölvupósti til fjölmiðla að meðlimir félagasamtaka, bæjarfulltrúar, bæjarstjóri, stjórnendur fyrirtækja og stofnana í Fjarðabyggð verði meðal þeirra sem ganga á milli húsa í bæjarhverfunum sex til þess að safna undirskriftum.

En það eru fleiri en íbúar í Fjarðabyggð sem eru ósáttir við að hægt gangi í vegagerð. Hanna Birna Kristjánsdóttir, oddviti sjálfstæðismanna í borgarstjórn Reykjavíkur, benti á það í yfirlýsingu sem hún sendi fjölmiðlum í gær að verið væri að fresta fjölmörgum vegaframkvæmdum í Reykjavík. Nefndi hún þar Sundabraut, mislæg gatnamót við Kringlumýrarbraut og göng undir Öskjuhlíð. Gagnrýndi hún meirihlutann í borgarstjórn fyrir að standa að samkomulagi við ríkisvaldið um þessa frestun.

Óvíst er hvort þessi þrýstingur sveitastjórnarmanna hafi nokkuð að segja því að eins og fram kom í fréttum fyrr í vikunni telur Alþjóðagjaldeyrissjóðurinn að hægar gangi að ná endum saman í ríkisfjármálum en áður var talið.