Skattur fælir kísiliðnað frá

„Ef þetta verður að lögum er ég verulega hræddur um að okkar fjárfestar muni hætta við," segir Magnús Garðarsson, forstjóri Íslenska kísilfélagsins, um fyrirhugaða breytingu á lögum sem munu leggja kolefnisgjald á rafskaut sem meðal annars er notað til kísilframleiðslu.

Breytingin er hluti af frumvarpi um ráðstafanir í ríkisfjármálum sem var til umræðu á þingi í upphafi mánaðar. Umsagnarferli er nýlokið og frumvarpið verður næst tekið fyrir í efnahags- og viðskiptanefnd.

Íslenska kísilfélagið vinnur að gerð kísilverksmiðju í Helguvík en Magnús segir í samtali við Fréttablaðið að þetta gjald muni breyta öllu umhverfi til kísilframleiðslu hér á landi.

„Þetta er mjög hár skattur sem mun hækka enn meira fram til 2015, og þegar svona skattur er kominn er alltaf hægt að halda áfram að hækka hann þar til að svona iðnaður hér á landi verður alls ekki samkeppnishæfur." Magnús bætir því við að þó að Kísilfélagið sé komið lengst í ferlinu, séu fleiri kísilfyrirtæki að undirbúa starfsemi hér á landi. Þau áform séu í hættu vegna kolefnisgjaldsins.

„Þetta drepur alveg niður allar efnahagslegar forsendur fyrir kísilvinnslu á Íslandi. Fyrirtækin fara einfaldlega eitthvert annað. Til dæmis er hægt að fá raforku á svipuðu verði í Bandaríkjunum, þar sem ekki er talað um kolefnisskatta." Hann segist jafnframt vera hissa á að stjórnvöld, sérstaklega Vinstri græn, sjái ekki kostina sem kísilframleiðsla á Íslandi hefur út frá umhverfissjónarmiði.

Í greinargerð með frumvarpinu er þess getið að álagning kolefnisgjalds verði endurskoðuð á næsta ári, en Magnús segir það ekki gefa ástæðu til bjartsýni.

„Við gerðum fjárfestingarsamning við ríkið, einmitt til að tryggja fjárfestum okkar fyrirsjáanlegt hagkerfi. Þar segir að engar áætlanir séu um að leggja nýja skatta á orkufreka starfsemi. Svo er ekki liðið árið áður en svona nokkuð kemur fram. Trúverðugleiki stjórnvalda er enginn ef af þessu verður."- þj