Íslandsbanki skráði eiginfjárhlutfall sitt of hátt

Íslandsbanki skráði eiginfjárhlutfall sitt of hátt í árshlutauppgjöri sínu þann 30. júní á síðasta ári. Þetta er ein af niðurstöðum athugunar Fjármálaeftirlitsins  á tilteknum upplýsingum í eiginfjárskýrslu Íslandsbanka hf.

Á vefsíðu eftirlitsins segir að Fjármálaeftirlitið gerði athugun á tilteknum upplýsingum í eiginfjárskýrslu Íslandsbanka hf. miðað við 30. júní 2010 á grundvelli heimildar í lögum. Fjármálaeftirlitið aflaði upplýsinga og gagna í tengslum við athugunina með fundum í desember 2010. Auk þess fór stofnunin fram á frekari upplýsingar og gögn á tímabilinu nóvember 2010 til janúar 2011.

Athugunin beindist fyrst og fremst að flokkun lána Íslandsbanka hf. með veði í viðskiptahúsnæði í áhættuvogir. Jafnframt beindist hún að þekkingu, skilningi og viðhorfi starfsmanna bankans, gæðum upplýsingakerfa og hvernig hann væri í stakk búinn til að afhenda upplýsingar. Fjármálaeftirlitið lauk athuguninni með skýrslu dagsettri 1. júní 2011 eftir að Íslandsbanka hf. hafði verið gefinn kostur á að koma á framfæri andmælum sínum.

Fram kemur í skýrslu Fjármálaeftirlitsins að ákveðin atriði í framkvæmd Íslandsbanka hf. hafi verið aðfinnsluverð og eru helstu athugasemdir í skýrslunni eftirfarandi:

Notkun Íslandsbanka hf. á 50% áhættuvog á lán tryggð að fullu með veði í viðskiptahúsnæði var ekki í fullu samræmi við reglur um eiginfjárkröfur og áhættugrunn fjármálafyrirtækja. Framkvæmd bankans leiddi meðal annars í ljós að eiginfjárhlutfall í árshlutauppgjöri bankans miðað við 30. júní 2010 var metið of hátt.

Skráningu upplýsinga og úrvinnslu þeirra vegna lána sem athuguð voru reyndist að hluta til ábótavant.

Fjármálaeftirlitið vill taka fram að framkvæmd Íslandsbanka hf. hafði óveruleg áhrif á eiginfjárhlutfall bankans og því ekki teljandi áhrif fyrir viðskiptamenn, kröfuhafa eða hluthafa bankans.

Með vísan til laga fór Fjármálaeftirlitið fram á úrbætur í samræmi við athugasemdir sem gerðar voru í skýrslunni. Fjármálaeftirlitið beindi þeim tilmælum til Íslandsbanka hf. að yfirfara verkferla við útfyllingu eiginfjárskýrslna og endurskoða lána- og tryggingakerfi bankans. Fjármálaeftirlitið fór einnig fram á að stjórn Íslandsbanka hf. fæli innri endurskoðunardeild að yfirfara úrbætur bankans og skila stofnuninni skýrslu þess efnis.

Fjármálaeftirlitið mun uppfæra gagnsæistilkynningu þessa á vefsíðu stofnunarinnar þegar skýrsla Íslandsbanka hf. um úrbætur liggur fyrir, að því er segir á vefsíðunni.