Microsoft og Tölvumiðlun í samstarf

Microsoft og Tölvmiðlun hafa gert með sér samning um þróunarsamstarf á hugbúnaði. Samkvæmt samningnum verður svokölluð H3 heildarlausn í mannauðsmálum frá Tölvumiðlun flutt yfir á Microsoft SQL Server og mun Tölvumiðlun í kjölfarið reiða sig meira en áður á Microsoft lausnir við hugbúnaðargerð félagsins.

Tölvumiðlun segir að þarna sé um að ræða stærsta samning sinnar tegundar sem Microsoft hefur gert við íslenskt hugbúnaðarhús. Samstarf fyrirtækjanna var kynnt á ráðstefnu Tölvumiðlunar í Hörpu fyrir helgi.

Samstarfssamningurinn hefur verið á annað ár í vinnslu og hefur Tölvumiðlun notið aðstoðar starfsfólks Microsoft Íslandi við þá grunnvinnu sem nauðsynleg var til þess að gera samninginn að veruleika.