Gjaldeyrisútboð Seðlabankans í tilteknum farvegi

Niðurstaða í öðru gjaldeyrisútboði Seðlabankans til eigenda aflandskróna var að mörgu leyti í samræmi við útkomu fyrsta útboðsins, og virðist sem þessi þáttur í afléttingu gjaldeyrishafta sé kominn í tiltekinn farveg, hvað varðar verð, magn og tíðni útboða næsta kastið. Það hlýtur að teljast jákvætt, en ljóst má þó vera að fleiri þættir þurfa að koma til svo draga megi nægilega mikið úr lausum krónueignum erlendra aðila til þess að hægt sé að ráðast í almenna afléttingu hafta.

Fjallað er um málið í Morgunkorni greiningar Íslandsbanka. Þar segir að í útboðinu bárust alls tilboð að fjárhæð 52,2 milljarða kr. og var tilboðum tekið fyrir 14,9 milljarða kr., sem var í samræmi við markmið Seðlabankans. Lágmarksverð samþykktra tilboða var 215 kr. á hverja evru líkt og í fyrsta útboðinu. Meðalverðið nú var hins vegar nokkru lægra en þá, 216,33 kr. á móti 218,89 í fyrsta útboðinu. Seðlabankinn tók tilboðum yfir lágmarkinu að fullu, en tilboð sem voru jöfn lágmarksverðinu voru samþykkt hlutfallslega sem nam 44% af upprunalegri fjárhæð.

„Spyrja má hvers vegna bankinn kaus að taka síðarnefndu tilboðunum aðeins að hluta, fremur en að hækka fjárhæð tekinna tilboða. Vera má að hann vilji stilla framboði króna í hóf í seinni legg viðskiptanna sem fyrirhugaður er í ágúst, en þá munu lífeyrissjóðir væntanlega kaupa verðtryggð ríkisbréf sem samsvarar þeirri krónufjárhæð sem Seðlabankinn fékk í útboði gærdagsins og greiða fyrir með gjaldeyri. Þannig aflar bankinn aftur þess gjaldeyris sem greiddur verður úr forða hans fyrir aflandskrónurnar samkvæmt útboði gærdagsins,“ segir í Morgunkorninu.

„Eins og í fyrsta útboðinu bauðst ríkissjóður til þess að taka við greiðslum fyrir gjaldeyri eftir útboð gærdagsins í formi ríkisvíxla og ríkisbréfa með gjalddaga fyrir árslok 2013 á kjörum sem í stórum dráttum endurspegluðu markaðskjör. Í tilkynningu Lánamála ríkisins í morgun kemur fram að enginn kaupenda í útboðinu í gær nýtti sér þennan rétt. Tekin tilboð virðast því öll hafa verið frá þeim aflandskrónueigendum sem geyma krónur sínar á innlánsreikningum.

Sá hópur erlendra krónueigenda er talinn óþolinmóðari en eigendur ríkispappíra og þar að leiðandi tilbúinn til að sætta sig við hærra verð í evrum fyrir krónur sínar en síðarnefndi hópurinn. Lægri heildarupphæð tilboða í útboðinu nú en í júníútboðinu gæti einmitt bent til þess að "snjóhengjan" margumtalaða, þ.e. sú fjárhæð aflandskróna sem þrýstir hvað mest á að yfirgefa gjaldmiðilinn við fyrsta tækifæri, hafi minnkað í takti við niðurstöðu fyrsta útboðsins.“