Bankasýslan undirbýr sölu fjármálafyrirtækja

Undirbúningur er hafinn að gerð söluáætlunar á hlutum Bankasýslu ríkisins í fjármálafyrirtækjum. Þetta kemur fram í nýútkominni ársskýrslu Bankasýslunnar.

Nafnverð þessara eigna er um 137 milljarðar kr. Eignirnar eru (hlutur innan sviga): Landsbankinn (81,3%),  Arion banki (13,0%),  Íslandsbanki (5,0%), Sparisjóður Bolungarvíkur (90,9), Sparisjóður Vestmannaeyja (55,3%), Sparisjóður Svarfdæla (90,0%), Sparisjóður Norðfjarðar (49,5%) og Sparisjóður Þórshafnar (75,8%)

Í skýrslunni segir að það sé í verkahring Bankasýslu ríkisins að gera tillögur til fjármálaráðherra um hvort og hvenær eignarhlutir í fjármálafyrirtækjum verði boðnir til sölu. Verkefnið er mikilvægt. Tímasetning og framkvæmd sölu hefur margþætt áhrif.

Fyrst ber að nefna áhrif á mögulega ávöxtun ríkissjóðs af fjárfestingunni og því hvort öðrum markmiðum með eignarhaldi ríkisins hefur verið náð.

Í öðru lagi mun framkvæmd sölu hafa bein áhrif á fjármálafyrirtækin sem í hlut eiga þar sem uppbygging eigendahóps mótast í sumum tilvikum að mestu leyti af ákvörðunum ríkisvaldsins við sölu.

Í þriðja lagi ber að nefna áhrif á kaupendur, en ríkisvaldið mun ekki geta selt eignarhluti fyrr en meiriháttar óvissuþáttum í rekstri og umhverfi fjármálafyrirtækjanna hefur verið eytt.

Í fjórða lagi má loks nefna að sala stórra eignarhluta getur haft veruleg áhrif á þróun hlutabréfamarkaðar, en afar mikilvægt er að vel takist til við stórar nýskráningar á markað eftir hrun íslenska hlutabréfamarkaðarins. Gera má ráð fyrir að verðmyndum verði viðkvæm, jafnvel þannig að tilhneiging verði til bólumyndunar þegar fjármálamarkaður er lokaður og fjárfestingarþörf fagfjárfesta er stöðug.

Það er því ljóst að miklu skiptir að vel takist til við undirbúning og framkvæmd söluáætlunar, sem og annarra verkefna Bankasýslunnar. Af hálfu stofnunarinnar var því lýst yfir þegar á fyrsta starfsári að vegna núverandi og fyrirsjáanlegra verkefna væri nauðsynlegt að fjölga starfsmönnum m.a. til að stofnunin byggi yfir nauðsynlegum þekkingargrunni.

Þá yrði stofnunin að geta leitað til utanaðkomandi sérfræðinga þegar þörf kræfi, en í málefnum Bankasýslunnar kann að vera nauðsynlegt að leita til erlendra sérfræðinga vegna tiltekinna verkefna. Uppbygging stofnunarinnar hefði þurft að eiga sér stað á árinu 2010 þar sem verkefni hennar eru aðkallandi, hagsmunir miklir og starfstími takmarkaður. Fjármögnun stofnunarinnar gaf hins vegar ekki svigrúm til þess.