Er ég ekki örugglega í fókus?

Lytro er líklega með skrýtnustu myndavélum sem þú hefur séð. Hún er ferstrendingslaga, á öðrum endanum er lítill snertiskjár og á hinum endanum er óvenjulega stór linsa fyrir svona litla vél. En þótt að Lytro sé smá þá býr í henni tækni sem er áður óþekkt, í það minnsta á neytendamarkaði. Þú þarft nefnilega aldrei að fókusa neitt.

Helsti kostur Lytro er nefnilega höfundarréttarvarin tækni sem framleiðandinn kallar lifandi myndir og er knúin áfram af svokallaðri ljósrýmistækni. Í venjulegum myndavélum þarftu að velja hvar í ljósrýminu myndin er staðsett þegar þú tekur myndina, og þar með fókuspunktinn. Lytro hinsvegar tekur mynd af öllu ljósrýminu svo þú getur valið fókuspunktinn í eftirvinnslu.

Dæmi: Þú ert í partíi og einhver vina þinna tekur upp á einhverju sem vert er að skrásetja í mynd, þú sérð fugl sem þér finnst fallegur, barnið þitt stendur í lappirnar í fyrsta skipti. Þessi og svo mörg önnur augnablik krefjast þess að þau séu fönguð á mynd og þá máttu engan tíma missa. Lytro nefnilega tekur mynd af öllu því sem sést og þú þarft ekki að hafa áhyggjur af því að bakgrunnurinn sé í fókus frekar en viðfangsefnið.

Lytro er líka hröð, það fer enginn tími í að fókusa enda gerist það allt eftirá. Í myndavélinni er líka öflug aðdráttarlinsa sem getur stækkað allt að áttfalt og hún er mjög ljósnæm.

Eftirvinnsla fer fram í sérhönnuðum hugbúnaði sem fylgir myndavélinni og geta notendur annaðhvort valið fókuspunktinn þar eða breytt myndinni í Flash-mynd og sett á netið, t.d. á Facebook þar sem þeir sem skoða myndirnar geta valið fókuspunktinn sjálfir.

Tæknin á bak við Lytro-myndavélina gerir hana sjálfkrafa að 3D myndavél og er gert ráð fyrir að hugbúnaðaruppfærsla fyrir slíka úrvinnslu verði tilbúinn einhverntíma á næsta ári.

Lytro fæst í þremur litum; ljósblá eða grá með 8GB geymsluplássi (um það bil 350 myndir) mun kosta 399 Bandaríkjadali sem er um 48 þúsund, en sú rauða er með 16GB geymsluplássi (um það bil 750 myndir) og mun kosta 499 Bandaríkjadali sem er um 60 þúsund krónur. Myndavélin er væntanleg á Bandaríkjamarkað í upphafi næsta árs.

Umfjöllun blaðamanns Cnet um vélina (myndband).

Nánari upplýsingar og dæmi um myndir úr vélinni má sjá á lytro.com.