Framtíðarsýn á You Are in Control

Stafræna byltingin er staðreynd sem hefur breytt atvinnuháttum okkar og krefst nýs hugsunarháttar af stefnumótandi aðilum og leiðandi öflum í atvinnulífinu. Mikill vöxtur skapandi greina er ekki síst afsprengi stafrænnar byltingar. Ný listform og dreifileiðir eiga auðveldari aðgang að neytendum. Við getum nálgast neytandann á gagnvirkari hátt en áður og leiðandi álitsgjafar eru nú oft úr röðum almennings jafnt sem fjölmiðlamanna eða gagnrýnenda. Tæknifyrirtæki hafa sprottið upp og eflst af þessum sökum. Efnisgerð og listsköpun á nú orðið greiðari leið yfir landamæri og útflutningur því ekki sama ögrun og áður var. Þessi þróun þýðir að engin atvinnugrein í Evrópu eða jafnvel heiminum öllum býr við jafn hraðan hagvöxt og skapandi greinar.

Á YAIC er rýnt í hvernig viðskipti og dreifileiðir skapandi greina eru að þróast. Þetta er eina ráðstefnan í þessum efnum á Íslandi þar sem listir og efnisgerð er skoðuð í samhengi við tækniþróun. YAIC er ætlað að auðvelda þeim sem starfa í skapandi greinum á Íslandi að mynda tengsl við þá sem eru fremstir á alþjóðavettvangi í menningarviðskiptum og markaðssetningu og um leið að fræðast um það framsæknasta sem er að gerast í þessum efnum.

Í ár verður sjónunum beint sérstaklega að höfundarrétti. Þannig verður tekist á um þær ólíku leiðir sem menn vilja fara – annars vegar þar sem frítt menningarefni er sagt sjónarspil og hins vegar þar sem því er haldið fram að tæknivæðingin sé burðarás framþróunar. Hins vegar verður litið á aukinn samruna og samvinnuform skapandi greina. Nýjar leiðir í markaðssetningu og samskiptaaðferðum.

You Are in Control (YAIC) er samstarfsverkefni okkar sem störfum í tónlist, sviðslistum, hönnun, leikjagerð, bókmenntum, myndlist og kvikmyndum. Við höfum áður unnið sameiginlega að því að láta taka saman hagræn áhrif skapandi greina fyrir íslenskt samfélag sem sýndi að hér er á ferðinni einn stærsti atvinnuvegur þjóðarinnar með um 200 milljarða króna veltu. YAIC er mikilvægur vettvangur til að skoða þau fjölmörgu tækifæri sem felast í skapandi greinum.