Hætta á fordómum „af erlendu bergi“

Alltaf öðru hverju má lesa eða hlusta á upphaf frétta eins og ég las í einu dagblaðanna nýverið:

„Tvær konur búsettar á Íslandi af erlendu bergi brotnar hafa verið úrskurðaðar í gæsluvarðhald…“

Átakanlega sorglegt mál fyrir þá sem í hlut eiga. En hvað með alla aðra útlendinga búsetta á Íslandi, þeir eru stimplaðir „þjófar“ vegna svona frétta. Af hverju er ekki bara strax gengið hreint til verks og sagt af hvaða þjóðerni viðkomandi er? Auðvitað verður samt sem áður hópur saklausra fyrir barðinu á þessari stimplun en það er þó búið að afmarka hópinn þannig að við hin sem erum af öðru þjóðerni fáum frið.

Með svona fréttaflutningi er ýtt undir útlendingafordóma á Íslandi. Ég er alinn upp við það að koma fram við fólk eins og þú vilt að komið sé fram við þig, þar á meðal að taka ekki það sem aðrir eiga. Sem stoltur íslenskur ríkisborgari verð ég samt fyrir barðinu á þessum fordómum þar sem ég er fæddur í Taílandi.

Þjóðerni sést ekki á fólki!Fyrst ég er farinn að skrifa um þessi mál langar mig til að leiða huga ykkar lesendur góðir að nokkru sem ég heyri líka all oft. „Já hún er nú Thaí“ eða jafnvel „Tæja“ (sem er frekar neikvætt orð í íslensku ) sagt í neikvæðum tóni, já eða „hann er Taílendingur“ svo þegar hið rétta kemur í ljós þá var viðkomandi bara alls ekki frá Taílandi heldur hafði viðkomandi asískt útlit, kannski frá Filippseyjum, Kambódíu, Kína eða jafnvel bara nágrannar okkar frá Grænlandi.

Fólk með svipað útlit sem ekki er gott fyrir þá sem ekki þekkja vel að greina á milli. Vendu þig því á ef þú veist ekki hvaðan viðkomandi er að segja að hann/hún sé ættuð frá Asíu. Það særir stolt okkar Taílendinga að verið sé að bendla okkur við afbrot og framkomu sem ekki er sæmandi því öll viljum við leggja gott til íslensks samfélags.