Áttatíu milljóna króna sekt vegna verðsamráðs

Samkeppniseftirlitið hefur ákveðið að leggja 80 milljóna króna sekt á Langasjó, móðurfélag Síldar og fisks og Matfugls vegna verðsamráðs. Málið tengist smásöluverðlagningu á kjöti og unnum kjötvörum sem voru verðmerktar fyrir Bónus.

Samkeppniseftirlitið birti í desember síðastliðnum ákvörðun þar sem greint er frá brotum, annars vegar verslana Bónuss, og hins vegar Sláturfélags Suðurlands, Reykjagarðs, Kjötafurðastöðvar Kaupfélags Skagfirðinga, Norðlenska, Kjarnafæðis og Kjötbankans vegna samkeppnishamlandi samvinnu um verð. Þetta gerðu fyrirtækin með tvíhliða samningum eða samstilltum aðgerðum í tengslum við smásöluverðlagningu á kjöti og unnum kjötvörum sem kjötvinnslurnar höfðu verðmerkt fyrir Bónus.

Þessi fyrirtæki óskuðu eftir því að ljúka málinu með sátt við Samkeppniseftirlitið. Á þeim grundvelli nýtti Samkeppniseftirlitið sér heimild samkeppnislaga og gerði sátt við hvert þeirra. Í sáttunum fólst m.a. að fyrirtækin viðurkenndu brot á samkeppnislögum og greiddu samtals 405 milljónir í sekt vegna þeirra.

Langisjór, móður félag Síldar og fisks og Matfugls, óskaði eftir sáttarviðræðum við Samkeppniseftirlitið en þær viðræður skiluðu ekki niðurstöðu. Þurfti Samkeppniseftirlitið því að taka afstöðu til aðgerða fyrirtækjanna í sérstakri ákvörðun og var ákveðið að leggja áttatíu milljóna króna sekt á þau.