Verkfræðistofur leita að verkefnum erlendis

Tæplega tvö hundruð verk- og tæknifræðingar eru án vinnu samkvæmt tölum Vinnumálastofnunar. Framkvæmdastjóri Verkfræðingafélags Íslands segir það áhyggjuefni hversu litlar upplýsingar liggja fyrir um landflótta í stéttunum.

Það er af sem áður var hjá verk- og tæknifræðingum þegar kemur að atvinnuhorfum. Tæplega 200 manns eru nú án vinnu, rúmlega hundrað verkfræðingar og tæplega níutíu tæknifræðingar.

Landslagið í þessum stéttum hefur gjörbreyst eftir hrunið fyrir þremur árum og hefur hæglega gengið að skapa ný störf. Um árabil hafði atvinnuleysi verið nánast óþekkt í þessum geira.

Íslenskar verkfræðistofur hafa margar hverjar gripið til þess að leita verkefna fyrir utan landsteinanna og er þar einkum horft til Noregs. Stórar verkfræðistofur, þar á meðal Almenna verkfræðistofan, fá nú tekjur sínar í miklu meira mæli þaðan heldur en áður.

Árni Björn Björnsson, framkvæmdastjóri Verkfræðingafélags Íslands, segir það áhyggjuefni að litlar sem engar upplýsingar liggi fyrir um hversu margir úr þessum stéttum hafa flutt úr landi.

Eitt af því sem hert hefur ólina hjá fyrrnefndum stéttum eru litlar virkjanaframkvæmdir en verkfræðistofur hafa miklar tekjur af þeim, einkum hönnunarvinnu og eftirliti. Sem dæmi um þetta keypti Landsvirkjun þjónustu af íslenskum verkfræðistofum fyrir tæplega sextán milljarða á árunum 2001 til og með 2010, sé miðað við verðlag hvers árs.