WOW flutt í Express-setrið

Iceland Express flutti nýverið í Ármúla úr Grímsbæ, þar sem höfuðstöðvar þess voru um árabil.

Húsnæðið í Grímsbæ stóð þó ekki lengi autt, því nú hefur nýstofnað flugfélag Skúla Mogensen, WOW Air, flutt tímabundið inn í gömlu höfuðstöðvar keppinautarins, á meðan leitað er að framtíðarhúsnæði.

Express-menn voru ekkert allt of hrifnir af því hvernig WOW Air var hleypt af stokkunum, kröfðust lögbanns á störf fyrrverandi forstjóra síns, Matthíasar Imsland, fyrir félagið og sökuðu hann um að hafa reynt að lokka til sín viðskiptavini. Það er því ekki víst að flutningur WOW Air í gamla Express-setrið hafi vakið mikla lukku.

WOW ku þó ekki hafa verið að apa eftir erkifjendunum, heldur eingöngu leigt hentugt, laust húsnæði á hagstæðu verði – og lætur sér nægja hálfa hæðina sem Express nýtti áður.