Hylmir þú yfir glæp?

Kynferðisofbeldi gegn börnum er alvarlegt vandamál um heim allan. Myndefni á netinu þar sem börn eru beitt kynferðisofbeldi og sýnd á kynferðislegan hátt, oft nefnt barnaklám, er ein birtingarmynd þess. Slíku efni hefur lengi verið dreift manna á meðal en með tilkomu netsins hefur umfangið aukist til muna og erfiðara er að stemma stigu við því. Tengsl eru á milli mansals og framleiðslu á myndefninu. Börn í fátækum löndum, og löndum þar sem lítil áhersla er lögð á vernd barna, eru afar berskjölduð fyrir hvers konar ofbeldi.

Framleiðsla, varsla og dreifing á áðurnefndu myndefni er ofbeldi gagnvart börnum og alvarlegt brot á réttindum þeirra. Það hefur í för með sér miklar þjáningar og niðurlægingu fyrir þau börn sem í hlut eiga og er vitnisburður um glæpi sem þau hafa verið beitt. Með dreifingu myndefnisins á netinu, heldur ofbeldið gegn barninu áfram og brotamönnunum fjölgar þar sem þeir sem sækjast eftir efninu viðhalda eftirspurn og þar með ofbeldinu.

Barn er einstaklingur undir 18 ára aldri. Samkvæmt 19. og 34. gr. barnasáttmála Sameinuðu þjóðanna eiga börn rétt á vernd gegn líkamlegu, andlegu og kynferðislegu ofbeldi og gegn þátttöku í hvers kyns kynferðislegri háttsemi, vændi eða klámi. Oft er því borið við af brotamönnum sem nýta sér slíkt efni á netinu, að þeir hafi ekki vitað að um barn væri að ræða. Hér gildir að barn skal ávallt njóta vafans og mikilvægt að tilkynna um efni ef minnsti grunur er um að barn komi þar við sögu.

Það er brýnt að almenningur haldi vöku sinni við að uppræta efni af þessum toga. Barnaheill - Save the Children á Íslandi, í samstarfi við SAFT (Samfélag, fjölskylda og tækni) og embætti ríkislögreglustjóra, hafa nú endurbætt ábendingahnapp um ólöglegt og óviðeigandi efni tengt börnum á netinu. Hnappinn er að finna á www.barnaheill.is og markmiðið er að hann fari á vefsíður fyrirtækja og stofnana. Með því að tilkynna um efni þar sem börn eru beitt kynferðislegu ofbeldi, getur almenningur lagt hönd á plóg við að loka vefsíðum og stuðlað að því að gerendur og þolendur finnist. Það verður að stöðva ofbeldi og glæpi gegn börnum á netinu. Strax.