Kobe vinsælastur í vali á Stjörnuliðunum

Aðdáendur NBA-deildarinnar kjósa þessa dagana liðin fyrir Stjörnuleikinn. Kobe Bryant er sem fyrr vinsæll og hefur fengið flest atkvæði allra leikmanna í deildinni.

Byrjunarliðið hjá Vesturdeildinni verður líklega Kobe, Chris Paul, Kevin Durant, Carmelo Anthony og Yao Ming. Kínverjinn er með yfirburðastöð hjá miðherjum þó svo hann sé meiddur og spili ekki meira í vetur.

Kínverjar hafa alla tíð verið duglegir við að kjósa sinn mann og gera það enn þó svo hann geti ekki spilað.

LeBron James og Dwyane Wade eru að skáka Boston-mönnunum Paul Pierce og Rajon Rondo um byrjunarliðssæti í Austurdeildinni.

Byrjunarliðin verða formlega tilkynnt 27. janúar.