Vildi reka lykilstarfsmenn og ráða starfsfólk nátengt sér

„Ég kannast ekki við samstarfsörðugleika," svarar Skarphéðinn Berg Steinarsson, stjórnarmaður hjá Iceland Express. Hann segir að þeir hafi rætt hugmyndir og áherslur sem Birgir Jónsson hafði í huga með fyrirtækið á fundi í London í vikunni. Að sögn Skarphéðins var samhljómur í þeim. Birgir sendi frá sér tilkynningu nú í kvöld þar sem hann sagði ekki vera grundvöll fyrir samstarfi á milli hans og stjórnenda félagsins.

„En það sem okkur greindi á voru skipulagsbreytingar á félaginu sem hann vildi koma í gagnið um mánaðamótin," segir Skarphéðinn og bætir við: „Sem var að segja upp lykilstarfsmönnum en sumir þeirra hafa starfað hjá félaginu frá upphafi, aðrir í langan tíma. Í stað þeirra vildi hann ráða fólk sér nátengt."

Birgir hætti sem forstjóri aðeins tíu dögum eftir að hann tók við starfinu. Hann sendi Skarphéðni bréfið í morgun. Skarphéðinn segist hafa beðið Birgi um að bíða með að senda bréfið á fjölmiðla svo fyrirtækið hefði ráðrúm til þess að takast á við höggið.

„En hann gat ekki beðið eftir því," segir Skarphéðinn. Aðspurður hvort það sé einhver staðgengill forstjóra eða ný forstjóri hafi þegar verið ráðinn svarar Skarphéðinn því til að svo sé ekki.

„En það er margt gott starfsfólk hjá fyrirtækinu sem mun sjá til þess að allt gangi eins og áður," segir Skarphéðinn að lokum.

Í formlegri yfirlýsingu sem stjórnin sendi síðan frá sér í kvöld segir:

,,Í yfirlýsingu sem Birgir Jónsson fráfarandi forstjóri Iceland Express sendi til fjölmiðla nú undir kvöld tilkynnti hann um starfslok sín sem forstjóri félagsins.

Ástæðuna nefnir Birgir vera þá að hann hafi ekki fengið það frelsi til að stýra rekstri félagsins, sem honum hafi verið lofað í upphafi. Af þessu tilefni er rétt að fram komi:

Þegar Birgir tók við sem forstjóri félagsins varð að samkomulagi að hann myndi stýra daglegum rekstri þess eins og almennt gildir um forstjóra fyrirtækja. Fyrr í þessari viku kom hann hins vegar með hugmyndir sem fólu það í sér að hreinsa út hluta af yfirstjórn félagsins, og ráða í hans stað fólk sér nákomið. Stjórn félagsins féllst ekki á þetta. Í kjölfar þess sagði Birgir upp störfum nú í morgun. Í samkomulagi við Birgi fólst ekki að honum yrði afhent eigendavald yfir félaginu.

Það hvernig Birgir ákveður síðan að tilkynna um starfslok sín einhliða og án samráðs við stjórn félagsins, eftir að hann hafði staðfest skriflega fyrr í dag að reynt yrði að hafa samráð um það og ekkert færi frá honum fyrr en á sunnudag segir meira en mörg orð.

Stjórn Iceland Express lýsir yfir undrun sinni á því hvernig mál hafa þróast sérstaklega miðað við hvernig Birgir kynnti hugmyndir sínar í upphafi ráðningar um framtíð félagsins."