Fá að kaupa í Högum á genginu 11-13,5

Almenningi og fagfjárfestum gefst tækifæri á að kaupa í 20-30% af útgefnum hlutum í Högum hf á genginu 11-13,5 krónur á hlut. Þetta kemur fram í fréttatilkynningu sem Arion banki sendi frá sér í dag. Hluturinn er í eigu Eignarbjargs, sem er dótturfélag Arion banka.

Eignabjarg hefur þegar selt 44% hlut til hóps undir forystu Hallbjörns Karlssonar og Árna Haukssonar, en í þeim hópi voru jafnframt lífeyrissjóðir og aðrir fagfjárfestar. Eignabjarg mun svo halda eftir um 20-30% eignarhlut þar til á næsta ári, fram yfir fyrirhugaða skráningu Haga í Kauphöll. Markmiðið er að útboðið geri Högum kleift að uppfylla skilyrði NASDAQ OMX Iceland um dreifingu hlutafjár og marki grunninn að dreifðu eignarhaldi á Högum og er bæði horft til þess að almenningur og fagfjárfestar eignist hlut í félaginu, en jafnframt er markmið seljandans að fá ásættanlegt verð fyrir eign sína.

Heildarsöluandvirði útboðsins getur numið á bilinu 2,7-4,9 milljörðum króna segir í tilkynningu frá Arion banka.Útboðið nemur 20% af útgefnum hlutum í Högum hf. þar af eru 12,5% ætluð tilboðsbók og 7,5% ætluð netáskrift. Seljandi kann þó að gera breytingar á þeirri skiptingu ef eftirspurn fjárfesta gefur tilefni til þess og mun þá hafa markmið útboðsins að leiðarljósi. Seljandi áskilur sér jafnframt rétt til að stækka útboðið í allt að 30% af útgefnu hlutafé.

Hagar reka 62 verslanir og fjögur vöruhús, en hjá fyrirtækinu starfa yfir 2.000 starfsmenn í um 1.300 stöðugildum.