Óvissa eftir Icesave-kosningu

Seðlabankinn mun annað hvort lækka stýrivexti um fjórðung úr prósenti eða halda þeim óbreyttum í 4,25 prósentum á næsta vaxtaákvörðunarfundi bankans á morgun, að mati fjögurra greiningardeilda og fyrirtækja.

Hagfræðideild Landsbankans og ráðgjafarfyrirtækið IFS Greining telja bæði innistæðu fyrir lækkun stýrivaxta. Landsbankinn segir ástæðuna fyrir því þá að gengi krónunnar hafi haldist stöðugt og að undirliggjandi verðbólga sé lág. Þá bendi tölulegar upplýsingar Hagstofunnar til að hagvöxtur hafi enn ekki látið á sér kræla.

Spá IFS greiningar litast af niðurstöðu þjóðaratkvæðagreiðslunnar í Icesave-kosningunum á dögunum. Fyrirtækið telur að sú ákvörðun meirihluta kjósenda að fella samninginn geti tafið fyrir losun gjaldeyrishafta og aukið líkurnar á stöðnun hagkerfisins.

Á móti telur IFS Greining að þetta kunni að verða síðasta vaxtalækkun peningastefnunefndar Seðlabankans og vísar til þess að Evrópski seðlabankinn hafi í síðustu viku hækkað stýrivexti.

Greining Íslandsbanka og Arion banka telja hins vegar báðar líkur á að stýrivöxtum verði haldið óbreyttum. - jab