Niðurstaða héraðsdóms gríðarlega mikilvæg

Samtök iðnaðarins segja að dómur Héraðsdóms Reykjavíkur í dag, þar sem fjármögnunarleigusamningar voru dæmdir ólöglegir, sé gríðarlega mikilvægur. Slíkir samningar voru einkum notaðir til að fjármagna kaup á atvinnutækjum fyrir hrun.

„Þessi niðurstaða er gríðarlega mikilvæg fyrir þau fjölmörgu fyrirtæki sem fjármögnuðu tæki og tól með þessum samningum. Eiginfjárstaða margra mun batna og reksturinn verður léttari. Samtök iðnaðins fagna dómnum en samtökin lögðu fram lögfræðiaðstoð við undirbúning málsins," segir í yfirlýsingu sem Samtök iðnaðarins birti á vefsíðu sinni í dag.

Samtök iðnaðarins búast við því að dómnum verði áfrýjað til Hæstaréttar og niðurstaða Hæstaréttar muni sennilega liggja fyrir í byrjun sumars.