Ríkið semur við flugfélögin

Ríkiskaup, fyrir hönd Fjármálaráðuneytis og aðila að rammasamningakerfi ríkisins, hafa gert rammasamning um millilandaflugfargjöld. Samið var við Iceland express og Icelandair.

Kostnaður vegna kaupa á flugsætum árið 2009 fyrir ríkið var samtals um 800 milljónir árið 2009 og því um umtalsverð viðskipti að ræða eins og segir í tilkynningu frá Ríkiskaupum og hagræðið því mikið fyrir ríkið.

Þá segir að algengustu flugleiðirnar hafi verið til Kaupmannahafnar og London. „Rammasamningurinn er liður í því að draga úr ferðakostnaði en áður hefur verið unnið í því að fækka ferðum og breyta fyrirkomulagi ferða á vegum ráðuneyta og ríkisstofnana.“

„Samningurinn nær til þriggja algengra áfangastaðanna í Evrópu þ.e. Kaupmannahafnar, London og Brussel og tveggja áfangastaða í Bandaríkjunum; Boston og New York. Samningurinn tryggir ríkisstarfsmönnum hagstæð kjör á flugsætum til og frá landinu, óháð ferðatíma,“ segir einnig.

Iceland express bjóða fast verð á fjórum af fimm leiðum, óháð ferðatíma og óháð því hve mikil fyrirvari er á brottför.

Icelandair býður fastan afslátt af flugsætum í þeirra vélum óháð fargjaldategund á öllum fimm boðnum leiðum.

Auk þessa geta aðilar að rammasamningum ætíð nýtt sérstök tilboð flugfélaganna tveggja ef slíkt reynist hagstæðara.