Tólf grunaðir innherjar rannsakaðir

Embætti sérstaks saksóknara hefur nú til rannsóknar tólf mál þar sem grunur leikur á innherjasvikum. Málin tengjast með einum eða öðrum hætti starfsemi föllnu bankanna þriggja.

Málin eru ekki langt komin í rannsókn að sögn Ólafs Þórs Haukssonar, sérstaks sóknara. Hann vildi ekki tjá sig um málin að svo stöddu eða skýra nánar efnisatriði þeirra.

Aðeins einu sinni hefur maður verið fundinn sekur um innherjasvik hér á landi. Það var Baldur Guðlaugsson, fyrrverandi ráðuneytisstjóri í fjármálaráðuneytinu, en hann var dæmdur í héraði í tveggja ára óskilorðsbundið fangelsi fyrir að selja hlutabréf í Landsbankanum fyrir 192 milljónir króna á sama tíma og hann bjó yfir innherjaupplýsingum. Baldur áfrýjaði niðurstöðunni til Hæstaréttar og er þess nú beðið að málið verði tekið fyrir í Hæstarétti.

Ekkert dómafordæmi er fyrir hendi úr Hæstarétti þegar kemur að innherjamálum og mun efnisleg niðurstaða réttarins því ráða miklu um hvernig tekið verður á málum sem þessum.

Embætti sérstaks saksóknara, sem sameinaðist efnahagsbrotadeild ríkislögreglustjóra nýverið, hefur nú til rannsóknar um 200 mál. Þar af komu 86 mál frá efnahagsbrotadeildinni. 90 mál voru þá fyrir til rannsóknar hjá embættinu, sem öll tengdust falli bankanna.

Á undanförnum vikum og mánuðum hafa slitastjórnir, skiptastjórar og skattayfirvöld vísað 24 málum til embættisins vegna gruns um lögbrot. Þau mál eru nú til rannsóknar hjá embættinu.