Ferðamannatímabilið lengist hér á landi

Tölur um veltu erlendra greiðslukorta hér á landi í október síðastliðnum sýna svo ekki verður um villst að ferðamannatímabilið er að lengjast hér á landi.

Þannig nam úttekt af erlendum greiðslukortum 3,6 milljörðum króna í októbermánuði, sem er aukning um 20% í krónum talið miðað við sama mánuð í fyrra. Að teknu tilliti til verðbólgu jókst velta vegna erlendra korta um 13,5% á milli ára.

Þessar tölur ríma við aðrar vísbendingar um mikla fjölgun ferðamanna hér á landi milli ára. Þá gæti lenging ferðamannatímabilsins einnig skýrt að hluta innflæði gjaldeyris og styrkingu krónu í október, að því er segir í Morgunkorni greiningar Íslandsbanka.