Samherji tekur upp hugbúnað frá Marel

Hugbúnaðurinn Innova frá Marel verður innleiddur við framleiðslustýringu og vinnslueftirlit hjá öllum landvinnslueiningum Samherja og völdum skipum fyrirtækisins. Fulltrúar fyrirtækjanna undirrituðu samning þess efnis í síðustu viku.

Fjallað er um málið á vefsíðu Samherja. Þar segir að samningurinn sé mikilvægur áfangi fyrir Samherja sem hefur í stefnu sinni að nýta sér ávallt nýjustu tækni sem völ er á hverju sinni í starfseminni, bæði á sjó og í landi, á Íslandi og  erlendis. Umfang fyrirtækisins er mikið og því mikilvægt að hafa sem besta yfirsýn og eftirlit með framleiðslunni.

Innova hugbúnaðurinn mun sjá stjórnendum fyrir öllum þeim upplýsingum sem nauðsynlegar eru til að geta tekið upplýstar ákvarðanir um framleiðsluna, allt frá því að tekið er við hráefninu þar til fullunnin vara er send úr húsi.

„Við höfum mjög góða reynslu af samstarfi við Marel þegar kemur að hugbúnaði fyrir okkar vinnslur. Marel þekkir þarfir sjávarútvegsins og það endurspeglast í virkni og notagildi hugbúnaðarins. Okkar markmið er að hafa traustan hugbúnað sem er í stöðugri þróun og fylgir okkur inn í framtíðina. Við teljum Marel uppfylla þær kröfur og því veljum við Innova,“ segir Finnbogi Reynisson, yfirmaður upplýsingatæknimála hjá Samherja.

Hafist verður handa við að innleiða hugbúnaðinn strax í maí á þessu ári.