Gagnrýnir sameiningu SpKef og Landsbankans harðlega

Eygló Harðardóttir, þingmaður Framsóknarflokksins, gagnrýnir harðlega áform um sameiningu SpKef og Landsbankans, hún hefur óskað eftir fundi í viðskiptanefnd vegna málsins.

Greint var frá því í gær að unnið er nú að því innan Bankasýslu ríkisins að renna SpKef, þ.e Sparisjóðnum í Keflavík, inn í Landsbankann, en Bankasýslan heldur á hlutum ríkisins í báðum fyrirtækjunum.

Þessi áform gagnrýnir Eygló Harðardóttir, þingmaður Framsóknarflokksins, harðlega.

„Við höfum endurreist að miklu leyti sambærilegt bankakerfi og var fyrir hrun, það er ennþá sama áhættan og jafnvel í einhverjum tilvikum sömu leikmenn og stefnumörkun stjórnvalda er engin.“

Hún segir samþjöppun í fjármálakerfinu valda aukinni kerfisáhættu sem gerir það að verkum að innistæðutryggingasjóður muni aldrei geta staðið undir þroti eins af stóru bönkunum, þar með gæti bankakerfið endað í sömu ógöngum og áður. Ekki má vaða áfram blint og stefnulaust eins og stjórnvöld hafa verið að gera.

Eygló myndi vilja sjá bankana í mun smærri einingum.

„Ég myndi vilja sjá það með fleiri og minni einingar þar sem það dregur úr kerfisáhættunni og þá eru meiri líkur á því að innistæðutryggingasjóður geti staðið undir falli eins banka ef hann lendir í erfiðleikum.“

Eygló hefur kallar eftir fundi í viðskiptanefnd vegna málsins og óskar eftir að efnahags- og viðskiptaráðherra og fjármálaráðherri mæti á fundinn ásamt forstjóra FME og seðlabankastjóra.