Davíð Oddsson bað um milljarðs dollara lán

Samkvæmt þeim skjölum sem Wikileaks hefur nýlega birt bað Davíð Oddsson, þáverandi seðlabankastjóri, Bandaríkjamenn um að lána Íslandi einn milljarð dollara árið 2008. Sendiráð Bandaríkjanna hvatti bandarísk stjórnvöld til þess að verða við beiðninni.

Þar segir að sendiráðið hafi haft áhyggjur af þeim fregnum að Rússar ætluðu að lán Íslendingum 4 milljarða evra. Þannig hefðu þeir tækifæri á að fá m.a. afnot af Keflavíkurflugvelli, það er aðstöðunni sem Bandaríkjamenn skildu eftir þar þegar þeir lögðu herstöð sína niður. Einnig gætu Rússar fengið aðgang að olíu- og gassvæðum undan ströndum Íslands.

Bandarísk stjórnvöld vildu hinsvegar ekki veita Íslendingum lánafyrirgreiðslu sökum þess að íslenski bankageirinn var orðinn margföld landsframleiðsla Íslands að stærð.

Vitnað er í bréf sem Davíð Oddssson sendi til Timothy Geithner sem þá var bankastjóri Seðlabanka New York ríkis. Bréfið er dagsett þann 24. október og í því biður Davíð um milljarðs dollara lán til meðallangs tíma. Davíð segir í bréfinu að Íslendingar hafi fallist á aðstoð frá Alþjóðagjaldeyrissjóðnum en þarfnist meiri hjálpar. Davíð nefnir einnig að nú hafi íslenski bankageirinn skroppið saman.

Þá er vitnað í bréf frá Carol van Voorst þáverandi sendiherra Bandaríkjanna á Íslandi. Hún hvetur stjórnvöld í Washington að íhuga alvarlega þessa beiðni frá Íslendingum. Hafa verði í huga að höfnun á henni gæti skaðað þá langtímahagsmuni sem Bandaríkjamenn hafi á Norður Atlantshafi.