Lítilsháttar aukning í veltu dagvöruverslana

Velta í dagvöruverslun jókst um 1,1% á föstu verðlagi í maí miðað við sama mánuð í fyrra og um 2,0% á breytilegu verðlagi. Þetta kemur fram í nýjum tölum Rannsóknarseturs verslunarinnar á Bifröst. Leiðrétt fyrir árstíðabundnum þáttum jókst velta dagvöruverslana í maí um 1,9% frá sama mánuði í fyrra og verð á dagvöru hefur hækkað um 0,9% á síðastliðnum 12 mánuðum.

„Sala áfengis dróst saman um 7,5% í maí miðað við sama mánuð í fyrra á föstu verðlagi og um 6,1% á breytilegu verðlagi. Leiðrétt fyrir árstíðabundnum þáttum nam samdráttur í veltu áfengis í maí 6,0% frá sama mánuði í fyrra.  Verð á áfengi var 1,5% hærra í maí síðastliðnum en í sama mánuði í fyrra,“ segir ennfremur.

Þá kemur fram að fataverslun dróst saman um 4,4% í maí miðað við sama mánuð í fyrra á föstu verðlagi og um 4,5% á breytilegu verðlagi á sama tímabili. „Leiðrétt fyrir árstíðabundnum þáttum jókst velta fataverslunar í maí saman um 4,7% frá sama mánuði árið áður. Verð á fötum var nær óbreytt frá sama mánuði fyrir ári.“  

Hinsvegar jókst velta skóverslunar um 9,2% í maí á föstu verðlagi og um 9,8% á breytilegu verðlagi miðað við sama mánuð í fyrra. Verð á skóm hækkaði um 0,6% frá maí í fyrra.

Mikil aukning í veltu húsgagna- og raftækjaverslana

Velta húsgagnaverslana jókst um 24,8% í maí frá sama mánuði í fyrra á föstu verðlagi og um 29,6% á breytilegu verðlagi. „Verð á húsgögnum var 3,9% hærra í maí síðastliðnum miðað við sama mánuð í fyrra. Velta sérverslana með rúm jókst í maí um 38,3% frá sama mánuði í fyrra á föstu verðlagi. Velta í sölu skrifstofuhúsgagna var 24,9% meiri í maí síðastliðnum samanborið við sama mánuð í fyrra á föstu verðlagi.“

„Sala á raftækjum í maí jókst um 46,3% á föstu verðlagi og um 28,9% á breytilegu verðlagi. Verð á raftækjum lækkaði um 11,9% frá maí 2010. Þar vegur þyngst verðlækkun á stórum heimilistækjum.