Skiptastjóri Baugs krefur Jón Ásgeir um 15 milljarða

Þrotabú Baugs Group hefur höfðað skaðabótamál á hendur Jóni Ásgeiri Jóhannessyni, fyrrverandi stjórnarformanni félagsins. Búið krefur Jón Ásgeir persónulega um fimmtán milljarða króna.

Málið snýst um það þegar Hagar voru seldir frá Baugi til eignarhaldsfélagsins 1998 ehf. í lok júní 2008, í fléttu sem kölluð var Project Polo. Málið var höfðað í lok síðasta árs og þingfest í febrúar.

Fimmtán milljarðar af söluverðinu fóru beint í það að kaupa hlutabréf í Baugi af fjórum félögum, sem öll voru í eigu stjórnarmanna Baugs. Félögin voru Gaumur og Gaumur Holding, í eigu Jóns Ásgeirs og fjölskyldu hans, ISP eignarhaldsfélag, í eigu Ingibjargar Pálmadóttur, eiginkonu Jóns Ásgeirs, og Bague SA, í eigu Hreins Loftssonar.

Skiptastjóri Baugs lítur svo á að á þessum tíma hafi bréfin í Baugi verið nær einskis virði og Jón Ásgeir hafi með þessu, „ásamt fjölskyldu sinni" eins og það er orðað, misnotað aðstöðu sína hjá Baugi til að koma verðmætum frá félaginu, sem þá stefndi hraðbyri í þrot, í vasa sjálfs sín og sér nákominna.

Ingibjörgu og Hreini er hins vegar ekki stefnt í málinu, ekki frekar en öðrum stjórnarmönnum, þar sem Jón Ásgeir er talinn hafa borið „mesta ábyrgð" á fjárfestingum félagsins.

Í svari við fyrirspurn Fréttablaðsins segir Jón Ásgeir að málið sé „steypumál". Salan á Högum hafi verið að undirlagi viðskiptabanka Baugs. „Ég persónulega fékk ekki krónu út úr þessu, það gefur augaleið," segir hann. „Að fara að elta mig persónulega í málinu er algjörlega út í hróa."

Fréttablaðið hefur greinargerð Jóns Ásgeirs í málinu undir höndum. Í henni segir að Baugur hafi alls ekki tapað á Project Polo-fléttunni. Frumkvæðið að henni hafi enn fremur komið frá Kaupþingi, ekki Baugi, og tilgangurinn hafi verið að lækka skuldir Baugs við bankann. - sh /