Rangar staðhæfingar um bóluefni – enn og aftur

Í Fréttablaðinu 22.12.2011 er birt grein eftir Þorstein Sch. Thorsteinsson um meinta skaðsemi bólusetninga og vanrækslu sóttvarnalæknis er varðar upplýsingar til almennings um innihaldsefni bóluefna. Þó að flestu af því sem fram kemur í greininni hafi margsinnis verið svarað áður er rétt að ítreka nokkur atriði.

Sóttvarnalæknir birtir á heimasíðu Embættis landlæknis upplýsingar um innihaldsefni allra bóluefna og vísar þar til upplýsinga frá ábyrgum aðilum sem eru Lyfjastofnun Evrópu (EMA) og Lyfjastofnun Íslands. Þar er vísað til rannsókna á öllum innihaldsefnum bóluefnanna sem hafa sýnt að innhaldsefnin eru örugg og því á engan hátt hægt að flokka þau sem eiturefni. Sóttvarnalæknir hefur því ekki haldið neinum upplýsingum frá almenningi heldur þvert á móti komið upplýsingum til skila um öryggi innihaldsefna bóluefna.

Þorsteinn setur fram fullyrðingar um skaðsemi bóluefna en einu tilvitnanirnar eru í upphrópanir aðila á hinum ýmsu vefsíðum sem ekki styðjast við neinar rannsóknir.

Það hefur enginn reynt að breiða yfir það, að í Finnlandi og Svíþjóð tengdist bólusetning með Pandemrix drómasýki hjá ungu fólki. Þessi tengsl hafa hins vegar ekki sést í öðrum löndum þrátt fyrir milljónir bólusetninga og hafa heldur ekki sést á Íslandi.

Í dag geisa ýmsir hættulegir barnasjúkdómar í mörgum nálægum löndum vegna lélegrar þátttöku í bólusetningum. Á Íslandi sjást þessir sjúkdómar ekki lengur því þátttaka í bólusetningum hér á landi hefur verið og er með miklum ágætum. Almenningur veit að bólusetning er besta aðferðin til að vernda börnin okkar gegn alvarlegum smitsjúkdómum.