Bréf í Högum upp um 18,1%

Hlutabréf í Högum hækkuðu um 18,1% í gær, sem var fyrsti dagur viðskipta með þau. Gengi bréfanna í útboði í byrjun desember var 13,5 krónur á hlut en lokagengi dagsins í gær var 15,95. Heildarviðskipti með bréfin námu 530 milljónum króna. Því jókst heildarvirði hlutabréfa í Högum úr 16,4 milljörðum króna í 19,4 milljarða króna á fyrsta degi viðskipta, eða um þrjá milljarða króna.

Þrjú þúsund fjárfestar keyptu 30% hlut í Högum á genginu 13,5 í útboði sem lauk fyrir rúmri viku. Fjárfestarnir greiddu samtals 4,9 milljarða króna fyrir. Virði þess hlutar er nú 5,8 milljarðar króna.

Annar hópur fjárfesta hefur einnig þegar ávaxtað eignarhlut sinn. Í febrúar 2011 seldi Arion banki 34% hlut í Högum til Búvalla slhf. á genginu 10. Hópurinn fékk auk þess forkaupsrétt á 10% eignarhlut til viðbótar á genginu 11. Samtals greiddu Búvellir því um 5,4 milljarða króna fyrir þennan 44% hlut í Högum. Virði þessa hlutar, miðað við lokagengi viðskipta í gær, er rúmlega 8,5 milljarðar króna. Því hefur virði hans aukist um 3,2 milljarða króna, eða um 57%.

Þá eru ótaldir fimm stjórnendur Haga sem fengu 1,4% hlut í félaginu endurgjaldslaust frá Arion banka fyrr á þessu ári. Virði hlutarins var 170 milljónir króna miðað við gengið 10. Virði hans miðað við lokagengi gærdagsins er 271,2 milljónir króna, og hefur því aukist um 100 milljónir króna á nokkrum mánuðum.

Mun meiri eftirspurn er eftir bréfum í Högum en framboð. Það kom bersýnilega fram í útboðinu í síðustu viku þegar eftirspurnin var áttföld. Arion banki á 21,7% hlut sem geymdur er inni í dótturfélaginu Eignabjargi. Bankinn og Búvellir gerðu hins vegar með sér samkomulag um gagnkvæmar söluhömlur sem gilda út febrúar 2012. Þær hömlur ná til 19% hlutar í eigu bankans og 12% hlutar í eigu Búvalla. Því getur bankinn sett lítið magn af bréfum út á markaðinn sem stendur. Arion þarf að selja allan hlut sinn í Högum fyrir 1. mars næstkomandi að kröfu Fjármálaeftirlitsins (FME).

Páll Harðarson, forstjóri Kauphallarinnar, segir það ánægjulegt að viðskipti með bréf í Högum hafi verið jafn virk og raun bar vitni. „Þetta voru viðskipti með tæplega 530 milljónir króna. Það er fáheyrð upphæð í seinni tíð og það sýnir að áhugi á viðskiptum á markaði er að kvikna aftur.“ Tilkynnt hefur verið um að Horn fjárfestingafélag, í eigu Landsbanka Íslands, sé í skráningarferli og stefni á skráningu snemma á næsta ári. Páll vill ekki nefna neinar dagsetningar í þeim efnum.

thordur@frettabladid.is