Að gefnu tilefni

Mér er bæði ljúft og skylt að leiðrétta misskilning sem gætir í grein Bjarna Ákasonar framkvæmdastjóra Epli.is, sem birtist í Fréttablaðinu fimmtudaginn 8. desember síðastliðinn. Öfugt við það sem skilja má af grein Bjarna hefur Microsoft ekkert við auknar vinsældir svokallaðra spjaldtölva að athuga – heldur fagnar þeim þvert á móti. Microsoft hefur þróað hugbúnað fyrir spjaldtölvur allar götur frá því að fyrirtækið kom með sína eigin „Tablet PC” á markað fyrir um 10 árum.

Spjaldtölvur hafa þróast hratt á undanförnum misserum, m.a. vegna virkrar samkeppni tölvuframleiðenda. Microsoft styður þessa þróun heilshugar og fagnar því að slíkar tölvur nýtist einstaklingum, fyrirtækjum og stofnunum. Um þetta erum við Bjarni bersýnilega sammála og áhyggjur hans eru því algjörlega óþarfar.

Hins vegar finnst mér Bjarni fara aðeins út af sporinu þegar hann lætur eftirfarandi orð falla: „Einnig væri ekki vitlaust að skoða hversu margir (og hverjir) hafa á undanförnum árum farið í boðsferðir til Redmond í Seattle. Þar er til húsa stór hugbúnaðarframleiðandi sem hefur afar mikla hagsmuni af viðskiptum við íslenskar stofnanir.” Hér á Bjarni greinilega við Microsoft.

Nú er það svo að Microsoft Ísland ehf. (sem er í 100% eigu Microsoft Corporation sem er með höfuðstöðvar sínar í Redmond) þarf, líkt og önnur bandarísk fyrirtæki sem starfa víða um heim, að uppfylla ströng skilyrði. Þar með talið sérstaka löggjöf sem nefnist „United States Foreign Corrupt Practices Act (FCPA)“. Meðal annars er þar lagt blátt bann við hvers konar greiðasemi við starfsmenn hins opinbera. Háar sektir eru lagðar á þá sem þessar reglur brjóta.

Starfsemi Microsoft á Íslandi fellur einnig undir þessar reglur og vel er fylgst með því að þeim sé fylgt. Fabúleringar Bjarna eru því algjörlega tilefnislausar. Engar boðsferðir með opinbera starfsmenn hafa verið farnar á okkar vegum. Til að enda þetta greinarkorn á uppbyggilegum nótum vil ég velta þeirri hugmynd upp að ég og Bjarni Ákason tökum höndum saman og hvetjum til þess að íslensk löggjöf á þessu sviði verði efld. Til þess að allir, ekki bara þeir sem reka hér sérstök dótturfyrirtæki, sitji við sama borð.