Taktu þátt á Betri Reykjavík

Fyrir rúmum mánuði opnaði lýðræðisvefurinn Betri Reykjavík í nýrri útgáfu og hefur náð töluverðum vinsældum. Þessi vefsíða býður fólki upp á að koma sínum málum á framfæri til Reykjavíkurborgar með nýstárlegum hætti.

Í lok hvers mánaðar eru þær hugmyndir sem fá mestan stuðning á Betri Reykjavík sendar til fagráða Reykjavíkurborgar til meðferðar. Þetta er ný leið til að koma málum til borgarinnar en að sjálfsögðu geta einstaklingar og hópar áfram sent inn mál til fagráða borgarinnar án þess að taka þátt í Betri Reykjavík.

Á vefnum getur fólk sett inn hugmyndir, tekið þátt í rökræðum og umræðum og lýst yfir stuðningi eða andstöðu við hugmyndir sem það sjálft eða aðrir setja inn. Kerfið stuðlar að málefnalegri umræðu sem skilgreinir sig sjálf í kringum ákveðin mál og málaflokka. Slóðin á vefinn er betrireykjavik.is.

Betri Reykjavík er rekin af Sjálfseignarstofnuninni Íbúar, hennar markmið er að vinna að betra lýðræði. Stofnunin er ekki rekin í hagnaðarskyni. Íbúar unnu á dögunum Alþjóðlegu raflýðræðisverðlaunin 2011 (The World eDemocracy Award), bæði fyrir vel hannað lýðræðiskerfi og fyrir mikla þátttöku á Betri Reykjavík í kringum kosningarnar 2010. Grunnþættir lýðræðis eru þátttaka, samræða, ákvörðun og framkvæmd. Í þessari röð. Stærsta vandamálið sem sækir að lýðræði á Vesturlöndum í dag er skortur á þátttöku. Við erum að bæta lýðræðið með því að auka þátttökuna og með því bæta rökræðuna.

Betri Reykjavík og Íbúar SES leggja sérstaka áherslu á persónuvernd þegar kemur að skoðunum fólks. Okkur finnst það vera sjálfsögð mannréttindi að geta tekið þátt í stjórnmálaumræðum án þess að koma fram undir réttu nafni og mjög auðvelt er að nota Betri Reykjavík undir dulnefni. Einnig skuldbinda Íbúar sig til að láta aldrei persónuupplýsingar í hendur þriðja aðila og til að fara að lögum um persónuvernd.

Á Facebook og vefjum sem nota þeirra athugasemdakerfi fer fram mikil pólitísk umræða, bæði í frjálsum texta, stuðningi við hópa og málefni og einnig í skoðanakönnunum. Fyrir stuttu byrjaði Facebook að loka á aðgang fólks sem það telur vera undir dulnefni eða með rangan aldur skráðan.

Upplýsingar um notendur eru nefnilega stærsta eign Facebook og því nákvæmari, því verðmætari.

Við bjóðum samfélagsmiðil með alvöru rökræðum um forgangsraðaðar hugmyndir sem gefur möguleika á að hafa áhrif á stjórnun borgarinnar. Það skiptir miklu máli á svona vef að notandinn hafi raunverulega möguleika á að hafa áhrif, ef slíkt er ekki fyrir hendi þá taka fáir þátt. Uppbyggingin á Betri Reykjavík hvetur til þátttöku og raðar einnig hugmyndum og rökum í gæðaröð.

Betri Reykjavík hefur þegar bætt lýðræði í borginni en forsenda þess að sú þróun haldi áfram er þátttaka almennings á vefnum. Lýðræði án þátttöku er ekkert lýðræði.