Tap kröfuhafa 7.500 milljarðar íslenskra króna

Kröfur erlendra lánastofnana á íslenska banka og önnur fyrirtæki hafa verið færðar niður um 7.485 milljarða króna frá því sem þær voru stuttu fyrir bankahrun ef miðað er við gengi dagsins í dag. Kröfurnar námu 75,3 milljörðum dala, 8.848 milljörðum króna, um mitt ár 2008. Þær eru nú 11,6 milljarðar dala, 1.363 milljarðar króna. Þetta kemur fram í nýjum tölum Alþjóðagreiðslubankans (BIS) sem sýna umfang krafnanna í lok júní síðastliðins.

Niðurfærslur erlendra lánastofnana vegna Íslands virðast vera farnar að taka á sig endanlega mynd því þær jukust einungis um tæplega 100 milljónir dala frá lokum marsmánaðar og fram á mitt ár 2011, eða um tæpt 1%.

Rúmlega 72% þeirra krafna á Ísland sem enn lifa eru í eigu evrópskra lánastofnana. Þar af er rúmur helmingur hjá þýskum fjármálafyrirtækjum. Tæplega þriðjungur allra lána sem veitt voru til Íslands fyrir bankahrun komu frá þeim. Þjóðverjar hafa líka tapað langmest allra á lánaviðskiptum við Ísland, um 1.973 milljörðum króna.- þsj