Guðrún og Þóra heilla erlenda fjárfesta

Fyrirtækið Puzzled by Iceland var eitt af sjö evrópskum sprotafyrirtækum sem tóku þátt í viðburðinum Meet the Dragons sem fram fór í Rotterdam á miðvikudag.

Puzzled by Iceland er hugarfóstur Guðrúnar Heimisdóttur og Þóru Eggertsdóttur sem stofnuðu fyrirtækið árið 2010 þegar þær voru báðar í fæðingarorlofi. Fyrirtækið framleiðir púsluspil sem hugsuð eru sem minjagripir fyrir ferðamenn.

Þær voru fulltrúar Íslands í viðburðinum Meet the Dragons en hann er byggður á sjónvarpsþáttunum Dragons Den sem sýndir eru í breska ríkissjónvarpinu, BBC. Sjö evrópsk sprotafyrirtæki hlutu þrjár mínútur hvert til að kynna hugmynd sína fyrir erlendum fjárfestum og áttu möguleika á að keyptur yrði hlutur í fyrirtækinu. Viðburðurinn var haldinn í tengslum við Alþjóðlegu athafnavikuna sem fram fór í Hollandi.

„Kynningin fór öll fram á ensku því fjárfestarnir voru frá fimm löndum. Við undirbjuggum okkur eins vel og við mögulega gátum, sóttum Dale Carnegie-námskeið og lágum yfir Dragons Den-þáttunum," útskýrir Guðrún þegar Föstudagur náði tali af henni skömmu eftir kynninguna.

Hún bætir við að ólíkt bresku sjónvarpsþáttunum átti kynningin sér stað innan um stóran hóp áhorfenda. Guðrún og Þóra voru þær þriðju á svið og að sögn Guðrúnar gekk kynningin vonum framar.

„Markmiðið var að reyna að fá nafnspjald hjá öllum fimm fjárfestunum. Við fengum nafnspjöld hjá tveimur og þeir hafa lýst yfir áhuga á að ræða frekar við okkur um mögulegt samstarf. Þóra sá um kynninguna og rúllaði þessu upp. Einn fjárfestirinn sagði að upphæðin sem við báðum um væri ekki sérstaklega há og við svöruðum því að við mundum hvort sem er fá þetta greitt út í íslenskum krónum og þá hló allur salurinn," sagði Guðrún.

Þær fóru fram á 300.000 evrur til að standa undir kostnaði við markaðssetningu á Puzzled by-vörunum í Danmörku og Noregi.

„Okkur er létt núna, þetta er svolítið eins og að ganga í gegnum fæðingu. Var erfitt meðan á því stóð en núna erum við komnar með barnið í hendurnar og erum ofsalega hamingjusamar."

sara@frettabladid.is