Rannsókn lokið í nokkrum málum

Sérstakur saksóknari hefur lokið rannsókn á hluta þeirra tíu mála sem embættið ætlar sér að klára á þessu ári. Heimildir Fréttablaðsins herma að á meðal þeirra mála sem rannsókn er lokið á sé hið svokallaða Sjóvármál. Fæst þeirra tíu mála sem á að ljúka fyrir áramót hafa þó fengið formleg málalok.

Þegar rannsókn mála lýkur fara þau inn á borð saksóknara hjá embættinu sem fær það hlutverk að ákveða hvort ákært verði á grundvelli hennar. Samkvæmt heimildum Fréttablaðsins verður ákært í flestum þeirra mála sem nú er verið að ljúka rannsókn á. Ef ákveðið verður að fara með málin í ákærumeðferð tekur saksóknarinn sér tíma til að setja saman ákæru úr niðurstöðum rannsóknarinnar.

Auk þeirra tíu mála sem ljúka á rannsókn á fyrir áramót er gert ráð fyrir að málalok verði í fjölmörgum málum til viðbótar hjá embættinu á fyrri helmingi næsta árs. Flest málin sem eiga að klárast á næstu mánuðum tengjast starfsemi föllnu bankanna: Kaupþings, Landsbanka og Glitnis. - þsj