Fjórðungur orðið fyrir tjóni

TækniFjórðungur stjórnenda íslenskra fyrirtækja sem sóttu nýlega ráðstefnu um tölvuöryggi sagði fyrirtæki sín hafa orðið fyrir fjárhagslegu tjóni af völdum tölvuárása á síðustu tólf mánuðum.

Alls sögðu 45 prósent fyrirtæki þeirra hafa orðið fyrir einhvers konar tölvuárásum. Þetta kemur fram í Vírnum, fréttabréfi sem ráðgjafafyrirtækið Deloitte gefur út.

Hafa ber í huga að könnunin var gerð á ráðstefnu um tölvuöryggismál og því ekki hægt að fullyrða um íslensk fyrirtæki almennt út frá tölunum. Þó benda þær til þess að tölvuárásir séu algengari hér á landi en búast mætti við miðað við þá athygli sem málefnið fær.

Fyrirtæki sem verða fyrir tölvuárásum vilja síður að upp komist um árásina. Ástæðan er sú að fréttist af slíkri árás getur það haft áhrif á það traust sem fyrirtækið nýtur, og þar með haft umtalsverð áhrif á fjárhag þess.

Í niðurstöðum bandarískrar könnunar sem sagt er frá í Vírnum kemur fram að virði fyrirtækja fellur að jafnaði um 17 til 31 prósent þegar upp hefur komist um tölvuinnbrot. Að jafnaði tekur það eitt ár fyrir fyrirtækin að laga orðspor sitt eftir innbrot. - bj