Milljarða afskriftir vegna Fasteignar

Kröfuhafar Eignarhaldsfélagsins Fasteignar munu þurfa að afskrifa milljarða króna vegna byggingar Háskólans í Reykjavík, ógjaldfærni Álftaness og lánabreytinga annarra sveitarfélaga sem átt hafa hlut í félaginu. Stærstu kröfuhafar þess eru Íslandsbanki og skilanefnd Glitnis.

Heimildir Fréttablaðsins herma að Fasteign verði skipt upp í móðurfélag og þrjú dótturfélög samkvæmt tillögum sem lagðar verða fyrir hluthafafund félagsins í lok þessa mánaðar. Eignir Reykjanesbæjar verða í einu félaginu, eignir annarra sveitarfélaga sem standa að Fasteign í öðru og afgangurinn af eignum Fasteignar í hinu þriðja. Skuldir verða látnar fylgja öllum eignunum en hluti þeirra verður afskrifaður. Stefnt er að því að þessari niðurstöðu verði hrint í framkvæmd fyrir komandi áramót.

Stærstur hluti afskrifta mun koma til vegna byggingar Háskólans í Reykjavík. Kostnaður vegna þeirrar framkvæmdar stóð í rúmum 15 milljörðum króna um síðustu áramót, samkvæmt ársreikningi Fasteignar. Háskólinn greiddi rúman milljarð króna í leigu vegna þessa á árinu 2010, sem hafði þau áhrif að rekstrarafkoma hans var neikvæð um 451 milljón króna á síðasta ári. Endursamið verður um þessa leigu í endurskipulagningunni.

Fasteign skilaði inn ársreikningi í lok september síðastliðins. Þar kemur fram að félagið hafi tapað 1,3 milljörðum króna á síðasta ári þrátt fyrir að leigutekjur þess hafi verið um 2,5 milljarðar króna miðað við gengi dagsins í dag. Félagið skuldaði um 44,5 milljarða króna um síðustu áramót.

Nánar er fjallað um málið í Markaðinum í Fréttablaðinu í dag.