Gátu ekki sýnt fram á tilvist samningsins

Sýslumaðurinn í Reykjavík hafnaði í gær beiðni Iceland Express um lögbann við því að Matthías Imsland, fyrrverandi forstjóri félagsins, nýtti sér upplýsingar sem hann hefði öðlast í starfi sínu við stofnun nýs flugfélags, WOW Air.

Forsvarsmenn Iceland Express fullyrtu að Matthías hefði undirritað ráðningarsamning sem hefði kveðið á um að yrði honum slitið af öðrum samningsaðila væri Matthíasi óheimilt á næstu tveimur árum eftir lok uppsagnarfrests að ráða sig til starfa hjá, sitja í stjórn eða eiga hlut í fyrirtæki sem keppti á sama markaði og Express. Matthías á innan við tíu prósent í félaginu, að því er lögmaður hans sagði hjá sýslumanni.

Lögmaður Matthíasar sagði við fyrirtöku málsins hjá sýslumanni að slíkur samningur hefði aldrei verið í gildi og Matthías ræki raunar ekki minni til þess að hafa nokkurn tíma skrifað undir ráðningarsamning.

Samningurinn var lagður fram sem gagn í málinu, óundirritaður, en sýslumaður taldi að þannig hefði hann ekkert sönnunargildi, að því er fram kemur í úrskurðinum.

Sigurður G. Guðjónsson, lögmaður Iceland Express, kvaðst hins vegar í samtali við Fréttablaðið í gær vera í sjöunda himni, enda samningurinn kominn í leitirnar. „Ég er búinn að eyða klukkutíma í að kemba allt sem ég gat kembt hjá Iceland Express og heldurðu að ég hafi ekki fundið samninginn, undirritaðan af Matthíasi Imsland.“

Sigurður segir samninginn verða lagðan fram þegar málið komi til kasta dómstóla, enda hafi Express ákveðið að kæra niðurstöðuna til héraðsdóms.

Sigurður var spurður um það hjá sýslumanni hvaða leyndarmál það væru sem Matthías byggi yfir og hann sagði það vera vitneskju um samninga við ferðaheildsala og allan „kostnaðarstrúktúr“ Express. Lögmaður Matthíasar benti á móti á að auðvelt væri að nálgast upplýsingar um hvaða ferðaheildsalar skipta við hvaða flugfélög. Þær lægju öllum opnar á vef Ferðamálaráðs.

Þá komu til tals ásakanir Express-manna þess efnis að Matthías hefði reynt að lokka starfsmenn Express til WOW Air. Sigurður tilgreindi starfsheiti þeirra sem þetta ætti við um, en kvaðst þó ekki geta sýnt fram á það gegn mótmælum lögmanns Matthíasar.

Express-menn fóru fram á að sýslumaður svipti Matthías síma og tölvu í eigu félagsins sem hann hefur enn til umráða. Lagt var fram yfirlit yfir símnotkun hans frá því að honum var sagt upp. „Engin rök eru sett fram hvers vegna gerðarþoli megi ekki tala við umrædda aðila í síma,“ segir hins vegar í úrskurði sýslumanns.